ایران (ویب ڈیسک)ایران نے فوجی پریڈ پر حملے کی ذمہ داری امریکی حمایتی خلیج ریاستوں پر عائد کردی۔واضح رہے کہ جنوب مغربی ایران میں فوجی پریڈ پر حملے میں پاسداران انقلاب کے 8 گارڈز سمیت 24 افراد جاں بحق اور 20 افراد زخمی ہوگئے تھے۔ایران کے شہر اہواز میں 1980 میں عراق کے ساتھ جنگ کو 38 سال مکمل ہونے کے حوالے سے فوجی پریڈ جاری تھی، جس میں دہشت گردوں کے گروپ نے حملہ کر دیا۔بی بی سی پر شائع رپورٹ کے مطابق ایران کے روحانی رہنما آیت اللہ خامنہ ای نے الزام عائد کیا کہ امریکا کی کٹھ پتلی ریاستیں ایران میں انتشار پھیلانا چاہتی ہیں۔ایرانی خبر رساں ادارے ارنا کے مطابق ایرانی صدر حسن روحانی نے اپنے تعزیتی بیان میں کہا کہ جو ممالک نام نہاد انسانی حقوق کی بات کرتے ہیں وہی اس حملے میں ملوث ہیں۔انہوں نے کہا کہ ہم اچھی طرح سے جانتے ہیں کہ اہواز حملے کے ذمہ دار کون ہیں، ہم انہیں نہیں چھوڑیں گے، ان کا پیچھا کریں گے۔خیال رہے کہ فوجی پریڈ پر حملے کی ذمہ داری اسلامک اسٹیٹ (آئی ایس) اور حکومت مخالف عرب گروپ اہواز نیشنل ریزسسٹینس نے قبول کی۔تاہم دونوں گروپوں کی جانب سے حملے میں ملوث ہونے کے شواہد پیش نہیں کیے گئے۔اس سے قبل وزیر خارجہ جاوید ظریف نے الزام لگایا تھا کہ دہشت گردوں کو بیرونی معاونت حاصل تھی اور ایران میں امریکی اسپانسر دہشت گردوں کا احتساب کرےگا۔ایران کے ریاستی میڈیا نے کہا تھا کہ ایران نے برطانیہ، ہالینڈ اور ڈنمارک کے سفیروں کو سمن جاری کرتے ہوئے الزام لگایا تھا کہ ان کے ممالک ایران مخالف گروپوں کی پشت پناہی کررہے ہیں۔وزارت خارجہ کے ترجمان بہرام قاسمی نے کہا کہ ان گروہوں نے یورپ میں حملے نہیں کیے اس لیے انہیں یورپی یونین نے کالعدم قرار نہیں دیا، یہ یقین ناقابل قبول بات ہے۔واضح رہے کہ اس سے قبل ایران نے سعودی عرب پر الزام لگایا تھا کہ وہ ایران میں عرب اقلیت علیحدگی پسندوں شرپسندوں کی حمایت کررہا ہے۔
