لارڈز (اے پی پی) انگلش ٹیم کے کپتان اور مایہ ناز بلے باز جوروٹ نے کہا ہے کہ بھارت کو ٹیسٹ سیریز میں 5-0 سے وائٹ واش کرنا ہدف ہے اسلئے فتح کے باوجود حریف ٹیم کو بقیہ میچز میں آسان حریف تصور کرنے کی غلطی نہیں کریں گے۔ انگلینڈ اور بھارت کے درمیان تیسرا ٹیسٹ 18 اگست سے شروع ہو گا اور میزبان ٹیم کو پانچ میچوں کی سیریز میں 2-0 کی برتری حاصل ہے۔اپنے ایک بیان میں انہوں نے کہا کہ بھارت کے خلاف دوسرے ٹیسٹ میں کامیابی پر بے حد خوشی ہو رہی ہے لیکن ابھی سیریز کے تین بڑے میچز باقی ہیں اسلئے ہماری تمام تر توجہ ان پر مرکوز ہے، بھارت کو ٹیسٹ سیریز میں کلین سویپ کرنا خواب ہے اور مقصد کے حصول کیلئے کھلاڑیوں کو بقیہ میچز میں بھی سو فیصد کارکردگی دکھانا ہو گی۔ انہوں نے کہا کہ ٹاپ آرڈر بلے بازوں کی ناکامی باعث تشویش ہے، امید ہے کہ وہ اگلے میچز میں عمدہ پرفارم کر کے ٹیم کو فتوحات دلانے میں کردار ادا کریں گے۔
