پاکستان(ویب ڈیسک) تحریک انصاف (پی ٹی آئی) نے عمران اسماعیل کو گورنر سندھ بنانے کا فیصلہ کر لیا ہے جس کی باضابطہ منظوری چیئرمین پی ٹی آئی عمران خان نے دے دی۔ پارٹی نے سندھ کے گورنر کے لیے عمران اسماعیل کے نام پر اتفاق کیا اور عمران خان نے اس فیصلے کی منظوری دی ہے۔ 25 جولائی کو انتخابات میں پی ٹی آئی کو ملک بھر میں اکثریت حاصل ہونے کے بعد پاکستان مسلم لیگ (ن) کے گورنر سندھ محمد زبیر نے عہدے سے مستعفی ہونے کا اعلان کیا تھا۔محمد زبیر نے 28 جولائی کو اپنا استعفیٰ صدر مملکت ممنون حسین کو بھیج دیا تھا جس کو منظور کر لیا گیا تھا۔ان کا کہنا تھا کہ ’آئینی طریقہ کار کے مطابق اپنا کردار ادا کیا اور اب صدر مملکت قائم مقام گورنر کی نامزد کریں گے۔‘پی ٹی آئی کے رہنما عمران اسماعیل نے عام انتخابات میں سندھ اسمبلی کی نشست پی ایس-111 سے حصہ لیا تھا اور کامیابی حاصل کی تھی۔عمران اسماعیل نے پارٹی کی جانب سے گورنر سندھ نامزد کیے جانے کے بعد کہا کہ مجھے گورنر کی بہت بڑی ذمہ داری سونپی گئی ہے تاہم سب جماعتوں کو ساتھ لے کر چلوں گا، میرے لیے شہری اور دیہی علاقے برابر ہیں۔انھوں نے کہا کہ حریف جماعتوں سے کہتا ہوں کہ وہ ایک قدم آگے آئیں ہم دس قدم بڑھائیں گے۔گورنر ہاﺅس کے اخراجات کم کرنے کا عزم ظاہر کرتے ہوئے انھوں نے کہا کہ گورنر ہاو¿س قائد اعظم کی رہائش گاہ بھی رہی ہے جبکہ گورنر ہاو¿س کے اخراجات بھی کم کیے جائیں گے۔محمد زبیر نے 2 فروری 2017 کو سندھ کے 32ویں گورنر کی حیثیت سے حلف اٹھایا تھا۔انہیں سابق گورنر جسٹس (ر) سعید الزماں صدیقی کے انتقال کے بعد صدر مملکت ممنون حسین کی جانب سے گورنر سندھ نامزد کیا گیا تھا۔
