لاہور (مانیٹرنگ ڈیسک) سابق فرسٹ کلاس کرکٹر طاہر شاہ نے کہا ہے کہ ٹیم میں تبدیلیاں کرتے رہنا چاہئے۔ کپتانی کا موقع بھی دوسروں کو دینا چاہئے۔ چینل ۵ کے پروگرام گگلی سے گفتگو کرتے ہوئے انہوں نے کہا کہ بیٹنگ‘ فٹنس پر سوالیہ نشان ہے۔ نئے لڑکے اور ٹیلنٹ کو موقع نہ دے کر قوم اور کھلاڑیوں کے ساتھ زیادتی ہے۔ اسکاٹ لینڈ کا انٹرنیشنل سطح پر نام نہیں ہے تو وہاں نئے لڑکوں کو تجربہ کے طور پر کھلانا چاہئے۔ ہار اورجیت کھیل کا حصہ ہے‘ لیکن ٹیم کے لیے ہیرے تراشنے کا اسکاٹ لینڈ میں اچھا موقع ہے۔ سپورٹس جرنلسٹ ہمایوں نذیر نے کہا ہے کہ بابراعظم کی انجری کے بعد حارث سہیل کو منتخب کرنا غلط ہے۔ بابراعظم کے بعد اصولی طور پر کامران اکمل کا نام آنا چاہئے تھا۔ ٹیم مینجمنٹ کو سوچ سمجھ کر کھلاڑیوں کو موقع دینا ہو گا۔ ٹیسٹ میچ میں راحت کی اچھی کارکردگی نہ ہونے کے باوجود ٹی ٹوئنٹی میں دوبارہ کھلایا گیا ہے۔ نئے لڑکوں کو کھلا کر اسکاٹ لینڈ سے ریٹنگ میں فرق نہیں آنا تھا۔ آغا سلمان کو موقع دے کرسپنرز چننے چاہئیں۔ قومی ٹیم کو سپنرز کی ضرورت ہے۔
