اسلام آباد(آن لائن)پاکستان مسلم لیگ (ن) نے سابق وزیرداخلہ چوہدری نثار علی خان کو پارٹی ٹکٹ نہ دینے کا حتمی فیصلہ کرلیا ہے۔چوہدری نثار علی خان تحریک انصاف میں شامل ہوں گے یا نہیں اس حوالے سے آئندہ 24چوبیس گھنٹوں میں اہم فیصلہ کیے جانے کا امکان ہے ۔انتہائی معتبر ذرائع سے معلوم ہوا ہے کہ نااہل وزیراعظم نوازشریف نے اپنے بھائی شہبازشریف کو اس بات پر قائل کرلیا ہے کہ چوہدری نثار علی خان کو ٹکٹ نہ دینے پر کوئی پارٹی کو نقصان نہیں ہوگا۔دوسری جانب چوہدری نثار علی خان مریم نواز اور حمزہ شہباز کو بھی کسی صورت ماننے کو تیار نہیں ہیں ایسی صورتحال میں نادان دوستوں سے دانشور دشمن بہتر ہے جس کے نتیجے میں شہبازشریف نے گزشتہ روز توہین آمیز باڈی لینگویج سے ایک مسیج دیا کہ چوہدری نثار علی خان ایک شکایتی انسان ہے اور وہ بچپنے سے کبھی باہر نہیں آئے ، عموماً وہ میری شکایتیں بھی نوازشریف سے لگایا کرتے تھے ۔شہبازشریف کی اس توہین آمیز باڈی لینگویج پر چوہدری نثار علی خان نے بھی اپنے تجزیہ پیش کرتے ہوئے کہا کہ ان کو میرے اوپر تبصرہ کرنے کی بجائے پارٹی حالات پر نظر رکھنی چاہیے۔جس پر مسلم لیگ (ن) کے ذرائع کا کہنا ہے کہ چوہدری نثار علی خان کی آخری ٹک ٹک جاری ہے اور وہ چاہتے ہیں کہ چوہدری نثار علی خان ازخود کسی پارٹی میں شمولیت اختیار کرلیں۔ تاکہ راولپنڈی ڈویژن میں ٹکٹوں کی تقسیم سے متعلق انہیں ان سے کوئی مشاورت نہ کرنی پڑے۔دوسری جانب پاکستان تحریک انصاف کے ذرائع کا کہنا ہے کہ چوہدری نثارعلی خان کی پی ٹی آئی میں شمولیت کے لئے کوششیں کی جارہی ہیں اور ممکن ہے کہ بہت جلد پاکستان تحریک انصاف کے چیئرمین عمران خان چوہدری نثارعلی خان کی رہا ئش گاہ پر جاکر انہیں پارٹی میں شمولیت کی دعوت دینگے۔
