پشاور (ویب ڈیسک) بس ریپڈٹرانزٹ منصوبے کے ڈیزائن میں ایک درجن سے زیادہ تبدیلیاں کی گئی ہیں جن کے باعث منصوبے کی لاگت میں ڈھائی ارب روپے کا اضافہ ہو گا۔ جدید سفری سہولتوں سے آراستہ بس ریپڈ ٹرانزٹ خیبرپختون خوا حکومت کا میگا پروجیکٹ ہے۔پشاور ڈویلپمنٹ اتھارٹی ذرائع کے مطابق منصوبے کے ڈیزائن میں بڑی تبدیلیاں کی گئی ہیں جن کی وجہ سے منصوبے کی لاگت ڈھائی ارب روپے بڑھ جائے گی۔ذرائع کے مطابق منصوبے کے تین سیکشنز میں مجموعی طور پر 9 بڑی تبدیلیاں کی گئی ہیں جن میں امن چوک میں زیرزمین اسٹیشن کا قیام اور ارباب سکندر خان خلیل فلائی اوور کے ساتھ بی آرٹی کے لیے نئے فلائی اوور کی تعمیر بھی شامل ہیں۔اسی طرح سکیشن ٹو میں سی ایس ڈی کے قریب ائیرپورٹ کے لیے راستہ رکھنے کا فیصلہ کیا گیا ہے اور ایف جی سکول کے سامنے بس سٹاپ کو امن چوک منتقل کردیا گیا ہے جب کہ تاتارا پارک اورتہکال میں بھی بس فلائی اوور سے گزاری جائے گی تاکہ ٹریفک کی روانی متاثر نہ ہو۔
