کراچی(نیوز ڈیسک) ایم کیو ایم کا چھٹا دھڑا سابق گورنر سندھ ڈاکٹر عشرت العباد کی سربراہی میں بنانے کی تیاری کی جارہی ہے، اس سلسلے میں دبئی میں پس پردہ سرگرمیاں جاری ہیں۔ ذرائع کے مطابق ایم کیو ایم لندن سے علیحدگی اختیار کرنے والے بابر غوری اور شمیم صدیقی بھی کچھ عرصے بعد اس نئے دھڑے کا حصہ ہونگے، چند روز پہلے ایم کیو ایم پاکستان کے سربراہ فاروق ستار نے عندیہ دیا تھا کہ ایم کیو ایم کا ایک اور دھڑا دبئی میں بن رہا ہے۔ لیکن اس کی تفصیلات بیان نہیں کی تھیں۔ یاد رہے کہ اس وقت ایم کیو ایم کے پانچ دھڑے پہلے سے موجود ہیں۔ ان میں مہاجر قومی موومنٹ ایم کیو ایم پاکستان، پاک سرزمین پارٹی، مہاجر اتحاد تحریک اور سلیم شہزاد کی نوزائیدہ تانگہ پارٹی شامل ہے۔ اس ڈویلپمنٹ سے آگاہ ذرائع کا کہنا ہے کہ الیکشن سے قبل نہ صرف کمال گروپ اور فاروق ستار کے درمیان اتحاد کرانے کی ایک کوشش کی جائے گی، بلکہ دبئی میں بننے والے مجوزہ دھڑے کو بھی اس کا حصہ بنادیا جائے گا۔ اگر تینوں دھڑے یکجا ہوگئے تو پھر باقی چھوٹے دھڑوں کو بھی اتحاد جوائن کرنے کا کہا جائے گا، تاہم ابتدائی مرحلے میں ان چھوٹے دھڑوں کو پلان کے حوالے سے اعتماد میں نہیں لیا گیا، ذرائع کے مطابق کراچی کی سیاست کو نئی شکل دینے والے نہیں چاہتے کہ ایم کیو ایم کا ووٹ بینک تقسیم ہوجائے اور اس کا براہ راست فائدہ پیپلز پارٹی کو ہو، جو اس صورت میں کراچی سے قومی اسمبلی کی مزید پانچ سے چھہ اور صوبائی اسمبلی کی درجن بھر سیٹیں حاصل کرنے کی پوزیشن میں آجائے گی۔ یوں اگلے الیکشن میں پیپلز پارٹی کو کاو¿نٹر کرنے کیلئے بنایا جانے والا سندھ ڈیمو کریٹک الائنس زیادہ مو¿ثر نہیں رہے گا۔
