لاہور(نیوزایجنسیاں) چیئرمین پی سی بی نجم سیٹھی کی صدارت میںگورننگ بورڈ کا اجلاس آج(بدھ کو) ہوگا۔اجلاس میں پاک بھارت کرکٹ سیریز کے قانونی معاملات کا جائزہ لیا جائے گا۔اجلاس میںسری لنکن کرکٹ ٹیم کی حالیہ پاکستان آمد کے حوالے سے بھی بی او جی کو بریفنگ دی جائےگی۔تفصیلات کے مطابق پاکستان کرکٹ بورڈ کے چیئرمین نجم سیٹھی نے بورڈ آف گورنز کا اجلاس آج (بدھ کو)طلب کر رکھا ہے جو ان کی سربراہی میں پہلا اجلاس ہوگا۔ اجلاس میں ڈومیسٹک کرکٹ کے معاملات پر بھی بحث ہوگی اجلاس میں ریجن کرکٹ کے صدر کی معیاد بڑھانے پر آئین میں ترمیم کا جائزہ لیا جائے گا۔ذرائع کے مطابق آئین میں ترمیم اسلام آباد ریجن کے صدر شکیل شیخ کو نوازنے کے لیے کی جارہی ہے جبکہ پی سی بی آئین میں چوتھی بار ریجن کا صدر بننے پر پابندی ہے۔اجلاس کا اہم ایجنڈا ریجن کرکٹ کے صدر کی میعاد بڑھانے کے لیے آئین میں ترمیم پر غور ہوگا، اس اقدام کی صورت میں سب سے زیادہ فائدہ چیئرمین نجم سیٹھی کے چہیتے شکیل شیخ کو ہوگا جو 2 بار اسلام آباد ریجن کے صدر رہ چکے ہیں، پی سی بی آئین میں ترمیم کی صورت میں شکیل شیخ کے تیسری بار صدر بننے میں حائل رکاوٹ ختم ہو جائے گی۔
