لاہور (اپنے سٹاف رپورٹر سے) وزیراعلی پنجاب محمد شہبازشریف نے کہا ہے کہ زراعت کو قومی معیشت میں ریڑھ کی ہڈی کی حیثیت حاصل ہے۔ زراعت، لائیوسٹاک کو ترقی دے کر غربت اور بےروزگاری جیسے مسائل پر قابو پایا جا سکتا ہے۔ ملک کی تاریخ میں پہلی مرتبہ کسانوں کی فلاح وبہبود اور زرعی شعبہ کی ترقی کے لئے اربوں روپے کا پیکیج دیا گیا ہے۔ مسلم لیگ (ن) کی حکومت نے زراعت کی ترقی اور کسانوں کی خوشحالی کو اپنی اولین ترجیح بنایا ہے۔ زرعی شعبہ اور کسان دوستی ہماری معاشی منصوبہ بندی کا بنیادی ستون ہے۔ فی ایکڑ پیداوار میں اضافے اور چھوٹے کاشتکار کی حالت زار بدلنے کےلئے انقلابی نوعیت کے ا قدامات کئے ہیں۔ زرعی شعبہ کی ترقی اور چھوٹے کاشتکار کو اپنے پاﺅں پر کھڑا کرنے کےلئے اربوں روپے کے وسائل مختص کئے گئے ہیں۔ ملک کی تاریخ میں پہلی بار چھوٹے کسانوں کو بلا سود قرضوں کی فراہمی کا شاندار پروگرام شروع کیا گیا ہے اور ملک کی 70سالہ تاریخ کا یہ بھی پہلا موقع ہے کہ بے زمین کاشتکاروں کو بھی بلاسود قرضے فراہم کئے جا رہے ہیں۔ بلاسود قرضوں کی فراہمی کے اس پروگرام سے زرعی پیداوار بڑھے گی اور چھوٹا کاشتکار خوشحال ہو گا۔ اربوں روپے کے بلا سود قرضوں کے اس پروگرام سے لاکھوں چھوٹے کاشتکار مستفید ہوں گے۔ پنجاب حکومت کے زرعی شعبے کی ترقی کے انقلابی پروگراموں سے حقیقی معنوں میں چھوٹے کسان کو ریلیف مل رہا ہے۔ زرعی ٹیوب ویلز کے بجلی کے نرخوں میں کمی، زرعی لوازمات کی رعایتی نرخوں پر فراہمی اور سستے داموں کھادوں کی فراہمی سے بھی چھوٹے کاشتکار کو ہی فائدہ ہواہے۔ اربوں روپے کا کسان پیکیج اور بلاسود قرضوں کی فراہمی کا پروگرام زرعی شعبے میں انقلاب کی نوید ہے اور کسان پیکیج اور بلاسود قرضوں کی فراہمی کا پروگرام چھوٹے کاشتکاروں کی فلاح کےلئے حکومت کا تاریخ ساز اقدام ہے۔ وزیراعلی محمد شہبازشریف نے ان خیالات کا اظہار اراکین قومی وصوبائی اسمبلی سے گفتگو کرتے ہوئے کیا۔ وزیراعلی نے کہا کہ پاکستان مسلم لیگ (ن) کی حکومت نے ہمیشہ کاشتکاروں کے مفادات کو مقدم رکھا ہے۔ کسان پیکیج اور بلاسود قرضوں کی فراہمی کے پروگرام بھی چھوٹے کاشتکاروں کی ترقی کو پیش نظر رکھ کر ترتیب دئےے گئے ہیں۔ انہوں نے کہا کہ بلاسود قرضوں کی فراہمی کا پروگرام زرعی معیشت کے فروغ کے حوالے سے انتہائی اہمیت کا حامل ہے اور یہ پروگرام زرعی شعبے کی ترقی اور سبز انقلاب کا پیشہ خیمہ ثابت ہوگا۔ اس پروگرام پر عملدرآمد کیلئے جدید ٹیکنالوجی کی مدد سے شفاف اور فول پروف نظام بنایا گیا ہے۔ اس پروگرام کے تحت اب تک اربوں روپے کے قرضے لاکھوں چھوٹے کاشتکاروں کو تقسیم کئے جا چکے ہیں جبکہ ڈیجیٹل سسٹم کے ذریعے کاشتکاروں کے لئے بلاسود قرضوں کے حصول کا طریقہ کار آسان بنایا گیاہے۔ انہوں نے کہا کہ چھوٹے کاشتکاروں کیلئے بلا سود قرضوں کی فراہمی کا پروگرام زرعی شعبہ کی ترقی کیلئے سنگ میل کی حیثیت رکھتا ہے اور اربوں روپے کے کسان پیکیج کے ذریعے غریب اور چھوٹے کاشتکاروں کو ان کا حق دیا گیا ہے۔ وزیراعلی پنجاب نے خیبر پختونخوا میں ڈینگی کی وباءسے نمٹنے کے حوالے سے پنجاب کی میڈیکل ٹیم کے ا راکین کی کارکردگی کو سراہتے ہوئے شاباش دی ہے۔ وزیراعلی نے کہا کہ خیبر پختونخوا کے بہن بھائیوں کو ڈینگی سے محفوظ رکھنے کے لئے تمام وسائل بروئے کارلائے جائیں اورڈینگی پر قابوپانے کے لئے خیبر پختونخوا کے عوام اور حکومت سے ہر ممکن تعاون کیا جائے۔ میڈیکل ٹیموں کے اراکین اور موبائل ہیلتھ یونٹ ڈینگی سے متاثرہ افراد کو طبی سہولتوں کی فراہمی کے لئے شب وروز کام کریں۔
