لندن (مانیٹرنگ ڈیسک) سابق وزیراعظم نے مسلم لیگ ن کی اعلیٰ قیادت کا اجلاس آج لندن میں طلب کرلیا ہے جس میں تازہ ملکی سیاسی صورتحال اور احتساب عدالتوں میں پیشی کے معاملات کے حوالے سے مشاورت کی جائیگی، اجلاس میں پارٹی اختلافات پر بھی گفتگو ہوگی مگر اس اجلاس میں سابق وزیرداخلہ چوہدری نثار کو ایک دفعہ پھر نظرانداز کردیاگیا ہے ، نجی ٹی وی چینل کے مطابق سابق وزیراعظم نواز شریف نے کل لندن میں سینئر پارٹی رہنماو¿ں کااجلاس طلب کرلیا ہے ، اجلاس میں نوازشریف کی وطن واپسی اور پارٹی صدارت کیلئے شہبازشریف کے نام پر غورکیا جائیگا، اجلاس کے دوران احتساب عدالتوں میں شریف خاندان کی پیشی کے حوالے سے فیصلہ کیا جائیگا جبکہ مریم نواز شریف کے سیاسی مستقبل کے تعین کے حوالے سے بھی مشاورت کی جائیگی ،نوازشریف کی زیر صدارت اجلاس میں وزیر اعظم شاہد خاقان عباسی کی شرکت بھی متوقع ہے جبکہ شہبازشریف ، اسحاق ڈار، خواجہ آصف اور برجیس طاہر بھی شریک ہونگے، سابق وزیراعظم نوازشریف کی جانب سے طلب کئے جانیوالے اجلاس میں سابق وزیرداخلہ چوہدری نثار کو مدعو نہیں کیا گیا، اجلاس میں مریم نواز خصوصی طور پر شرکت کرینگی۔
