لاہور(سپورٹس رپورٹر) قومی کرکٹر حارث سہیل نے برمنگھم میں اسکواڈ کو جوائن کر لیا جب کہ فاسٹ بولر محمد عباس کو آج ریلیز کر دیا گیا ہے اور وہ وطن واپس آجائیں گے۔حارث سہیل نے برمنگھم میں اسکواڈ کو جوائن کرلیا جب کہ انگلینڈ کی کنڈیشنز سے آگاہی کیلئے کیمپ میں طلب کیے گئے فاسٹ بولر محمد عباس کو ریلیز کر دیا گیا ہے اور وہ وطن واپس آجائیں گے۔علاوہ ازیں پاکستان ٹیم نے چیمپئنز ٹرافی سے قبل کنڈیشنز سے آگاہی کیلئے برمنگھم میں ڈیرے ڈال رکھے ہیں، جہاں ٹیم نے ان ڈور اور آﺅٹ ڈور پریکٹس کی، پی سی بی نے میگا ایونٹ سے قبل اپنے خرچ پر ٹیم کو وہاں ٹھہرایا ہوا تھا، آج سے قومی ٹیم آئی سی سی کی مہمان بن گئی ہے۔واضح رہے کہ عمر اکمل کے فٹنس ٹیسٹ میں ناکام ہونے کے بعد سلیکشن کمیٹی نے حارث سہیل کو قومی اسکواڈ کیلیے موزوں قرار دیتے ہوئے انہیں عمر امین اور آصف ذاکر پر فوقیت دی تھی۔پاکستان کر کٹ ٹیم بنگلہ دیش کیخلاف وارم آپ میچ سے (آج) ہفتہ کو مشن چیمپئنز ٹرافی کا آغاز کریگی۔پاکستان اپنا دوسرا وارم اپ میچ آسٹریلیا کیخلاف 29مئی کو کھیلے گا۔تفصیلات کے مطابق آئی سی سی چیمپئنز ٹرافی میں وارم اپ میچز کا سلسلہ جاری ہے،پاکستان اپنا پہلا وارم اپ میچ (آج)ہفتہ کو کو بنگلہ دیش کیخلاف کھیلے گا،میچ پاکستانی وقت کیمطابق دوپہر ڈھائی بجے کھیلا جا ئیگا۔سرفراز الیون کا دوسرا وارم اپ میچ 29 مئی کو آسٹریلیا کے خلاف ہوگا،پاکستان کا چیمپئنز ٹرافی کے گروپ مرحلے میں پہلا ہی مقابلہ روایتی حریف بھارت کے ساتھ شیڈول ہے۔وارم اپ میچز کے ذریعے ٹیم سرفراز پاک بھارت میچ سے قبل بہترین کمبی نیشن بنا سکتی ہے۔
