وزیراعظم شہباز شریف کی ایسٹر پر پاکستان اور دنیا بھرکی مسیحی برادری کو مبارکباد دیتے ہوئے کہا ہے کہ ہمیں فخر ہے کہ پاکستان مختلف عقائد اور ثقافتوں کا خوبصورت امتزاج ہے۔
ایسٹر 2024 کے موقع پر اپنے پیغام میں وزیراعظم شہباز شریف کا کہنا تھا کہ ایسٹر کے تہوار پر پاکستان اور دنیا بھر کی مسیحی برادری کو دل کی گہرائیوں سے مبارکباد پیش کرتا ہوں۔
وزیراعظم نے کہا کہ ایسٹر کا دن ہمیں حضرت عیسیٰ علیہ السلام کے پیار، رواداری اور عفو و درگزر کے پیغام پر غور کرنے اور اس کو اپنانے کا ایک موقع فراہم کرتا ہے، انہی اقدار کو اپناتے ہوئے ہم آج کی تنازعات سے بھری اس دنیا کو امن و آشتی کا گہوارہ بنا سکتے ہیں۔
شہباز شریف کا کہنا تھا کہ اس پرمسرت موقع پر میں پاکستان کے قیام اور اس کی سماجی و اقتصادی ترقی کی جدوجہد میں اپنی مسیحی برادری کے کلیدی کردار پر انہیں خراج تحسین پیش کرتا ہوں اور امید کرتا ہوں کہ وہ پاکستان کی ترقی اور استحکام میں اپنا فعال کردار ادا کرتے رہیں گے۔
انہوں نے مزید کہا کہ ہمیں فخر ہے کہ پاکستان مختلف عقائد اور ثقافتوں کا خوبصورت امتزاج ہے، آئیں ہم ایک روادار اور مربوط معاشرے کی تعمیر کے لیے متحد ہو کر کام کریں، ہم ملکر ان ملک دشمن قوتوں کو شکست دیں جو ہمارے معاشرے کے تانے بانے کو نقصان پہنچانے کی کوشش کر رہی ہیں۔
وزیراعظم شہباز شریف کا کہنا تھا کہ آج کے دن ایک بار پھر سے ہم اپنی تمام اقلیتوں کی سماجی ترقی اور فلاح و بہبود کیلئے کام کرنے کے اپنے عزم کا اعادہ کرتے ہیں، ہماری تمام مسیحی برادری کو پُرامن ایسٹر کی مبارکباد! پاکستان پائندہ باد ۔“
واضح رہے کہ دنیا بھر میں مسیحی برادری آج ایسٹر کا تہوار منا رہی ہے، دنیا بھر کے گرجا گھروں میں خصوصی عبادات کا اہتمام کیا جا رہا ہے۔
وفاقی وزیر عطا تارڑ کی ایسٹر پر مسیحی برادری کو مبارک باد
لاہور میں تقریب سے خطاب میں وفاقی وزیر اطلاعات و نشریات عطا تارڑ نے کہا کہ میں 70ہزار مسیحی ووٹرز کا نمائندہ بن کر اسمبلی میں آیا ہوں، قیام پاکستان میں مسیحی برادی کا اہم کردار ہے۔
انھوں نے کہا کہ ہماری ذمہ داری ہے کہ مسیحی برادری کے حقوق کا تحفظ کریں، ملکی سلامتی و بقا میں مسیحی برادری کی خدمات ناقابل فراموش ہیں۔
ان کا کہنا تھا کہ ہم نے امن اور ہم آہنگی کا پیغام دینا ہے، پاکستان کے آئین میں سب کے حقوق برابر ہیں، ہم مل کر پاکستان کی خدمت کریں گے، پورے پاکستان کے مسیحیوں کی فلاح وبہبود کیلئے کام کریں گے۔
