اسلام آباد: وفاقی وزیر اطلاعات مریم اورنگزیب نے کہا ہے کہ 2013 سے 2018 کے ترقی کے سفر کا آغاز ہو چکا ہے، ایک ہفتے بعد حکومت ختم ہو جائے گی اور نگران حکومت آ جائے گی، اسی جذبے کے ساتھ نگران حکومت کو ذمہ داری دیں گے۔
فارن میڈیا ڈیجیٹل مانیٹرنگ وال کی افتتاحی تقریب سے خطاب کرتے ہوئے مریم اورنگزیب نے کہا کہ ریڈیو پاکستان کی نشریات اب 52 ملکوں میں سنی جا سکیں گی، موجودہ حکومت نے اداروں کو بہتر کرنے کیلئے ہر ممکن اقدامات کیے ہیں، الیکٹرانک، پرنٹ اور ڈیجیٹل میڈیا کی مانیٹرنگ کا آغاز کیا تھا، یہ سینٹرل مانیٹرنگ سسٹم ہو گا، یہ مانیٹرنگ سسٹم پہلی دفعہ انسٹال کیا گیا ہے۔
وفاقی وزیر اطلاعات نے مزید کہا ہے کہ پی ایس ڈی پی کا پہلا فیز مکمل ہو چکا ہے، گزشتہ حکومت میں ریڈیو اور ٹی وی کی نیلامی کی باتیں ہوا کرتی تھیں، فارن میڈیا ڈیجیٹل مانیٹرنگ وال سے حالات حاضرہ سے آگاہی حاصل ہو گی، پندرہ ماہ میں ہم نے اکانومی کو ریسکیو کیا، پٹرول بڑھانا عوام کیلئے مشکل فیصلہ ہے، اقتدار سنبھالا تو ہم نے سیاست نہیں دیکھی ریاست کو دیکھا۔
مریم اورنگزیب نے کہا ہے کہ سر اٹھا کر کہتی ہوں ملک بچانے کیلئے ہم نے حکومت میں آنے کا فیصلہ کیا، گزشتہ حکومت نے ملک کو دیوالیہ کے قریب پہنچایا، آئی ایم ایف معاہدے کی خلاف ورزی کی، شہباز شریف نے آئی ایم ایف معاہدہ بحال کیا، ہم نے جو بھی فیصلے کیے ہیں ملک کو ڈیفالٹ سے بچانے کیلئے کیے ہیں، پٹرول بڑھانے کی دو وجوہات ہیں۔
انہوں نے کہا ہے کہ عالمی سطح پر قیمتیں بڑھ رہی ہیں اس وجہ سے بڑھائی گئیں، ہمیں پتا ہے ایک ہفتے بعد ہماری حکومت ختم ہو جائے گی، رات تک فیصلہ اس لیے نہیں کیا گیا وزیر اعظم کی کوشش تھی کم سے کم قیمتیں بڑھائی جائیں، اللہ کے فضل و کرم سے ہم نے پندرہ ماہ کام کیا ہے، معیشت کو استحکام دے کر ملک کو ترقی کی طرف لیکر جائیں گے، یہی معیشت کو ٹھیک کرنے کا راستہ ہے اسی کو آگے لیکر چلیں گے، ایس آئی ایف سی کے راستے سے ملکی معیشت کو استحکام ملے گا۔
