کراچی: (ویب ڈیسک) بلدیہ ٹاؤن میں داماد نے ساس کو تیز دھار آلے کے وار کرکے قتل کردیا ، داماد کا سسرال والوں سے جائیداد کا تنازع چل رہا تھا جبکہ وہ نشے کا بھی عادی تھا۔
تفصیلات کے مطابق جمعرات کی صبح بلدیہ ٹائون کے علاقے سعید آباد میں امام بخاری مسجد کے قریب گھر کے اندر سے خاتون کی لاش ملی جسے تیز دھار آلے کے وار کرکے قتل کیا گیا۔
اطلاع ملتے ہی پولیس اور ریسکیو ورکرز موقع پر پہنچ گئے اور لاش کو ضابطے کی کارروائی کے لیے سول اسپتال منتقل کیا گیا ، مقتولہ کی شناخت بختون بی بی زوجہ نور محمد کے نام سے کی گئی جس کی عمر تقریباً پچاس برس تھی۔
مقتولہ کے شوہر نور محمد نے بتایا کہ اس کی اہلیہ کو اس کے داماد یار گل نے قتل کیا ہے ، وہ نشے کا عادی ہے اور کافی عرصے سے جائیداد کا تنازع چل رہا تھا۔
اسے متعدد مرتبہ سمجھایا لیکن وہ نہ مانا ، جمعرات کی صبح بھی وہ گھر آیا اور اپنی ساس سے جھگڑا کررہا تھا کہ اس دوران اس نے تیز دھار آلے کے وار کرکے بختون بی بی کو قتل کردیا اور موقع سے فرار ہوگیا ، پولیس ملزم کی تلاش میں مختلف مقامات پر چھاپے مار رہی ہے ۔
