اسلام آباد: (ویب ڈیسک) اسلام آباد ہائیکورٹ نے سابق وزیراعظم عمران خان، امریکی سفارتکار، سابق ڈپٹی اسپیکر اور سابق وفاقی وزرا کے خلاف غداری کی درخواست خارج کر دی۔
سابق وزیر اعظم عمران خان، امریکی سفارتکار، سابق ڈپٹی اسپیکر قاسم سوری اور سابق وفاقی وزرا شاہ محمود قریشی اور فواد چوہدری کے خلاف غداری کی کارروائی کے لیے انٹرا کورٹ اپیل خارج کر دی۔
اسلام ہائی کورٹ کے جسٹس عامر فاروق اور جسٹس سردار اعجاز اسحاق خان پر مشتمل ڈویژن بنچ نے محفوظ فیصلہ سنایا اور سنگل رکنی بنچ کا فیصلہ برقرار رکھتے ہوئے درخواست ناقابل سماعت قرار دے کر خارج کر دی۔
واضح رہے کہ 11 اپریل کو اسلام آباد ہائی کورٹ کے سنگل رکنی بنچ نے ایک لاکھ روپے جرمانے کے ساتھ غداری کا مقدمہ درج کرانے کے لیے دائر درخواست خارج کر دی تھی۔
درخواست گزار مولوی اقبال حیدر نے اپنے مقدمے کی خود پیروی کی تھی اور دلائل دیتے ہوئے کہا تھا کہ سابق وزیر اعظم نے ایک جلسے کے دوران ایک خط عوام کو دکھایا اور امریکی سفارتخانے نے متنازع خط کو جعلی قرار دیا۔
چیف جسٹس پاکستان کا کہنا تھا کہ ریاست کو اپنا کام کرنے دیں، سیاسی مسائل کو عدالت کیوں لائے ہو، آپ نے اپنی درخواست میں استدعا کیا کی ہے،عمران خان منتخب وزیراعظم تھے انہیں پرویزمشرف سےموازنہ نہ کریں۔
