وفاقی وزیر اطلاعات فواد چوہدری نے کہا ہے کہ اوورسیز پاکستانیوں کو ووٹ کا حق دینا تحریک انصاف کا ایجنڈا ہے۔
اسلام آباد میں وفاقی وزیر برائے منصوبہ بندی اسد عمر کے ہمراہ پریس کانفرنس کرتے ہوئے وفاقی وزیر اطلاعات فواد چوہدری نے کہا کہ کابینہ اجلاس میں معیشت پر گفتگو ہوئی ہے جبکہ بجٹ سے قبل معاشی صورتحال کا جائزہ بھی لیا گیا ہے۔
انہوں نے کہا کہ موجودہ حکومت نے کابینہ کے سب سے زیادہ اجلاس بلا کر تاریخ رقم کی ہے۔
فواد چوہدری نے یہ بھی کہا کہ پیپلزپارٹی کے دور میں 67 جبکہ ن لیگ کے دور میں صرف 23 کابینہ اجلاس ہوئے ہیں جبکہ پیپلز پارٹی اور ن لیگ کے دور حکومت میں کابینہ کمیٹی کا کوئی اجلاس منعقد نہیں ہوا۔
وفاقی وزیر نے کہا کہ الیکٹرانک ووٹنگ تحریک انصاف شروع کرنا چاہتی ہے جبکہ الیکشن کمیشن کی جانب سے سوشل میڈیا پوسٹ پر کابینہ نے تشویش کا اظہار کیا ہے۔
فواد چوہدری نے یہ بھی کہا کہ چیف الیکشن کمشنر کو وضاحت دینا چاہیئے کہ پوسٹ کیسے سوشل میڈیا پر کی گئی جبکہ پریس کلب اور بار کونسلز کو الیکٹرانک ووٹنگ میں معاونت کریں گے، 8.5 ملین اوور سیز پاکستانیوں کو ووٹ کا حق ملنا چاہئیے۔
انہوں نے کہا کہ الیکشن کمیشن اوور سیز پاکستانیوں کے ووٹ کے لئے انتظامات کرے۔
وفاقی وزیر کا کہنا تھا کہ سی پیک سے منسلک چینی شہریوں کو اسپیشل ویزہ دیا جائے گا اور 48 گھنٹوں میں 2 سال کا ویزہ دیا جائے گا جبکہ پاکستانی سفارتخانے میں ویزے کے لئے خصوصی ڈیسک بھی بنا رہے ہیں۔
انہوں نے کہا کہ اجلاس میں فلسطین کے مسئلے کو عالمی سطح پر اجاگر کرنے پر وزیر خارجہ شاہ محمود قریشی کی کوششوں کو سراہا گیا جبکہ مسئلہ کشمیر پر ہونے والی پیش رفت پر بھی وزیر خارجہ اور ان کی ٹیم کی کارکردگی کی تعریف کی گئی ہے۔
وفاقی وزیر اطلاعات فواد چوہدری نے مزید کہا کہ کابینہ نے کورونا کے حوالے سے طبی امداد اور ادویات بوسنیا بھجوانے کا فیصلہ کیا ہے جبکہ کابینہ نے این ٹی ڈی سی کے ایم ڈی کی عارضی ذمہ داریاں محمد ایوب کو دینے کی منظوری بھی دے دی ہے۔
