ابوظہبی (مانیٹرنگ ڈیسک‘ نیوز ایجنسیاں) او آئی سی کا اعلامیہ جاری کردیا گیا ہے جس کے بعد پاکستان نے اعتماد میں نہ لینے پر احتجاج کیا ہے جب کہ اجلاس میں پاکستان کوایشیامیں انسانی حقوق کمیشن کامستقل رکن منتخب کرلیا گیا ہے۔بین الاقوامی خبر رساں ادارے کے مطابق متحدہ عرب امارات کی جانب سے او آئی سی کے وزرائے خارجہ کا 46 واں اجلاس طلب کیا گیا تھا جو کہ ختم ہوگیا بعد ازاں دو روزہ اجلاس کا اعلامیہ جاری کردیا گیا۔ اعلامیہ متحدہ عرب امارات کے وزیر خارجہ شیخ عبداللہ نے پڑھ کر سنایا، پاکستان نے اعلامیے پر اعتماد میں نہ لیے جانے پر احتجاج ریکارڈ کرایا ہے۔اختتامی سیشن میں پاکستان کے نمائندوں نے کھڑے ہوکر بھارتی وزیر خارجہ سشما سوراج کی شرکت پر اپنا احتجاج ریکارڈ کروایا جب کہ اسی وجہ سے پاکستانی وزیر خارجہ نے احتجاجاً شرکت کرنے سے معذرت کرلی تھی۔اعلامیہ میں وزیراعظم عمران خان کی جانب سے جذبہ خیر سگالی کے طور پر گرفتار بھارتی پائلٹ کی بھارت کو حوالگی کے اقدام کی تعریف کرتے ہوئے کہا گیا ہے کہ خطے میں قیام امن کے لیے یہ ایک خوش آئند قدم ہے جس پر پاکستان کے وزیراعظم تعریف کے مستحق ہیں۔اعلامیہ میں مزید کہا گیا ہے کہ ممبرممالک میں تنازعات کو بات چیت اور افہام و تفہیم سے حل کیا جائے، تنازعات کا تصفیہ عالمی قوانین کے مطابق سفارتی کوشش سے حل کیا جائے اور ممبر ممالک ایک دوسرے کی آزادی اور سیکیورٹی کا احترام کریں جب کہ یمن تنازع کا سیاسی حل تلاش کرنا بھی وقت کی سب اہم ضرورت ہے۔اعلامیہ کے مطابق پاکستان کوایشیا میں انسانی حقوق کمیشن کامستقل رکن منتخب کرلیا گیا ہے، مستقل رکن کاانتخاب انسانی حقوق کےلیے پاکستان کے تعمیری کردارکااعتراف ہے۔اوآئی سی کی جانب سے کشمیری عوام کی غیرمتزلزل حمایت کااعادہ بھی کیا گیا جب کہ مسئلہ کشمیرکو پاکستان اوربھارت کے درمیان بڑاتنازعہ قرار دیا گیا ہے۔اجلاس میں منظور کی گئی قرارداد میں کہا گیا کہ جنوبی ایشیامیں امن کےلیے مسئلہ کشمیرکاحل ناگزیرہے۔ پاکستان کو سفارتی محاذ پر زبردست کامیابی مل گئی، بھارتی وزیرخارجہ سشما سوراج کی موجودگی میں اوآئی سی نے کشمیریوں کی حمایت میں قرارداد منظور کرلی،قرارداد میں مقبوضہ کشمیر میں انسانی حقوق کی خلاف ورزیوں اور بھارتی دراندازی کی مذمت جبکہ مسئلہ کشمیر کا حل ناگزیر قرار دیا گیا۔ میڈیا رپورٹس کے مطابق پاکستان نے آرگنائزیشن آف اسلامی کوآپریشن(اوآئی سی ) کے اجلاس کا بائیکاٹ کیا لیکن اس کے باوجود مسئلہ کشمیر کے حل کیلئے قرارداد کو منظور کرلیا گیا ہے۔اس کو دنیا میں پاکستان کی سفارتی محاذ پر زبردست کامیابی قرار دیا جا رہا ہے۔بتایا گیا ہے کہ اوآئی سی کا 46ویں دوروزہ اجلاس ہوا۔جس میں اوآئی سی کے رکن ممالک نے شرکت کی۔تاہم پاکستان نے پاک بھارت کشیدگی کے باعث بھارتی وزیرخارجہ کی شرکت پر بطور احتجاج اوآئی سی اجلاس کا بائیکاٹ کیا اور وزیرخارجہ شاہ محمود قریشی نے شرکت نہیں کی۔لیکن اس کے باوجود پاکستان کے امن کے اقدامات کی تعریف کی گئی اور کشمیریوں کی حمایت میں قرارداد منظور کی گئی۔قرارداد میں کشمیری عوام کی حمایت کا عزم کیا گیا اور مسئلہ کشمیر کا حل ناگزیرقرار دیا گیا۔قرارداد میں واضح کیا گیا کہ پاکستان اور بھارت کے درمیان جموں ومقبوضہ کشمیر بنیادی تنازع ہے۔
