لاہور (خصوصی رپورٹ) زینب قتل کیس کے ملزم عمران علی کے جوڈیشل مجسٹریٹ کے سامنے اقبالی بیان دینے سے مبینہ طور پر انکار پر تفتیشی ٹیم تذبذب کا شکار ہے کیونکہ پولیس کے پاس ڈی این اے کے سوا اس کیس میں کوئی تائیدی شہادت موجود نہیں‘ ملزم نے دوران تفتیش اپنے ساتھ ہونے والی زیادتی کے واقعات کو جرم کی بنیادی وجہ بتایا ہے۔ پولیس کے ایک سینئر افسر نے نام نہ ظاہر کرنے کی شرط پر بتایا کہ قتل و ریپ ملزم کا انفرادی فعل تھا‘ ملزم نے دوران تفتیش ہوشربا انکشافات کئے۔ ملزم نے دوران تفتیش مبینہ انکشاف کیا کہ وہ خاندانی افراد کے ہاتھوں میں زیادتی کاشکار بھی ہوتا رہا۔ ملزم نے مزید انکشاف کیا کہ اس کے خواتین کے ساتھ بھی تعلقات تھے۔ سینئر افسر نے مزید بتایا کہ اس کو پولیس نے دو دفعہ تفتیش کیلئے حوالات میں بند کیا لیکن بیماری کا بہانہ بنانے پر پولیس نے اس کے مر جانے کا خدشہ ہونے پر اس کو چھوڑ دیا تھا۔ گرفتاری کے بارے میں سینئر افسر نے بتایا کہ زینب کی نعش کی برآمدگی کے بعد جب پنجاب حکومت نے ملزم کی گرفتاری کیلئے ایک کروڑ انعام کا اشتہار دیا تو ملزم کے حقیقی چچا نے شک اور ملزم کا ماضی دیکھتے ہوئے اس کی والدہ سے بات کی کہ انعام کی خاطر اس کو گرفتار کرا دیتے ہیں۔ پہلے تو ماں مان گئی لیکن بعد میں اس نے انکار کر دیا جس کا ملزم کو پتہ چلا تو گرفتاری سے بچنے کیلئے وہ پاکپتن چلا گیا تھا۔ انہوں نے مزید بتایا کہ زینب کے والد نے دعویٰ کیا ہے کہ انہوں نے ملزم کو گرفتار کرایا جس میں صداقت نہیں۔ ملزم کو ڈی این اے مثبت آنے پر پکڑا گیا۔ انعام کی رقم لینے کیلئے تمام لوگ اپنے اپنے دعوے کر رہے ہیں۔ ملزم کریمنل ذہن کا مالک ہے‘ یہ درندہ اپنی ہوس کیلئے چھوٹی بچیوں کا انتخاب کرتا تھا۔ ملزم کا کسی مافیا یا گینگ سے ابھی تک کوئی تعلق ثابت نہیں ہو سکا۔ ماہر قانون دان صفدر شاہین پیرزادہ نے بتایا کہ پولیس کو دوران ریمانڈ ملزم کا جوڈیشل مجسٹریٹ کے سامنے اقبالی بیان زیردفعہ 164ضابطہ فوجداری کے تحت ریکارڈ کرانا ہوتا ہے جس کی کیس میں سزا دینے کیلئے قانونی حیثیت ہوتی ہے۔ 8دن گزرنے کے بعد اگر پولیس تفتیش کے دوران ملزم کا اعترافی بیان ریکارڈ نہیں کرا سکی تو اس کا مطلب ہے کہ ملزم چالاک اور تفتیشی ٹیم کو چکر دیتا ہے۔ پولیس کے سامنے دیئے اقبالی بیان کو عدالت میں بطور شہادت استعمال نہیں کیا جا سکتا‘ جس پر سزا یا جزا دی جا سکے۔
زینب کیس
