لاہور(بی این پی)قومی کرکٹ ٹیم کے بالنگ کوچ اظہر محمود نے نیوزی لینڈ کے دورے کو چیلنجنگ قرار دیتے ہوئے کہا ہے کہ اگرچہ بالنگ پاکستانی ٹیم کی طاقت مگر میزبان ٹیم کو ہرانا آسان نہیں اور کیویز کو ان کے پائیں باغ میں زیر کرنے کیلئے مثبت کرکٹ کھیلنا ہوگی۔ گزشتہ روز قذافی اسٹیڈیم میں پریکٹس سیشن کے بعد میڈیا سے گفتگو کرتے ہوئے اظہر محمود کا کہنا تھا کہ نیوزی لینڈ کا دورہ انتہائی سخت ہو گا تاہم کھلاڑی پر اعتماد اور اپنا موثر کردارنبھانے کیلئے تیار ہیں۔ ان کا کہنا تھا کہ نیوزی لینڈ اپنی کنڈیشنز میں ایک مشکل ٹیم ہے جسے آسان نہیں سمجھا جا سکتا اور ویسے بھی سب سے پہلے نیوزی لینڈ کی کنڈیشنز کو سمجھنا ہوگا جہاں بالرز کو موسم کے لحاظ سے بالنگ کرنا ہو گی۔بی این پی کے مطابق اظہر محمود نے بالنگ کو پاکستانی ٹیم کی اصل قوت قرار دیتے ہوئے کہا کہ بالرز کا انہوں نے ایک گروپ تشکیل دیا ہے جس میں شامل بالرز اپنی بہترین صلاحیت کے مطابق کھیل پیش کریں گے لیکن ان میں سے کوئی انجرڈ یا ان فٹ بھی ہو سکتا ہے جس کیلئے انہیں فوری بہترین متبادل دستیاب ہو جائیں گے۔
