مقبوضہ بیت المقدس (نیااخبار رپورٹ) مقبوضہ بیت المقدس سے متعلق امریکی اعلان کے بعد کشیدگی میں اضافہ ہوگیا ہے۔ اسرائیلی میڈیا کے مطابق اسرائیلی فوج نے غزہ کی پٹی پر تازہ ترین حملہ میں وحشیانہ بمباری کی‘ جس کے نتیجہ میں سینکڑوں افراد شدید زخمی ہوگئے۔ بعض کی حالت تشویشناک بتائی جاتی ہے۔ بمباری کے بعد عورتوں‘ بچوں‘ بوڑھوں کی چیخ و پکار سے قیامت کا منظر نظر آرہا تھا۔ ہر طرف عمارتوں سے دھواں اٹھ رہا تھا۔ چاروں طرف تباہی و بربادی کے مناظر نے ہر آنکھ اشکبار کردی۔ زخمیوں کو فوری مقامی ہسپتالوں میں منتقل کردیا گیا۔ فلسطینی جہادی تنظیموں کے ارکان فوری امداد کے لئے پہنچ گئے جنہیں روکنے پر اسرائیل کی فوج اور مشتعل افراد میں جھڑپیں شروع ہوگئیں جن میں سینکڑوں نوجوان زخمی ہوگئے۔ فوجی کارروائی میں جنگی طیارے اور ٹینک استعمال کئے گئے۔ ادھر وائٹ ہاﺅس حکام نے کہا ہے کہ امریکی نائب صدر اور فلسطینی صدر کی ملاقات منسوخ کرنا نقصان دہ ہوگا۔ دریں اثنا امریکی کانگریس کے ایوان نمائندگان نے اس بل کی منظوری دے دی‘ جس سے فلسطینی اتھارٹی کی مالی امداد میں کمی ہوگی۔ بل کی منظوری کے حوالے سے اراکین ایوان نمائندگان کا کہنا تھا کہ امریکی امداد سے بظاہر یہ تاثر ملتا ہے کہ یہ امداد قتل کی وارداتوں کے لئے استعمال کی جاتی رہی ہے۔