لاہور(خصوصی رپورٹ) ماڈل ٹاﺅن رپورٹ پبلک ہونے کے بعد پنجاب میں شہباز شریف کے لئے بڑھتی ہوئی مشکلات اور کئی اراکین اسمبلی کے پارٹی چھوڑنے کی افواہوں کے بعد ن لیگ نے ساری توجہ پنجاب پر دینے کا فیصلہ کر لیا ہے۔ وفاقی اور صوبائی وزراء
کو ٹاسک دے دیا گیا ہے کہ پنجاب کو بچایا جائے۔ اگر پنجاب میں ہمارے خلاف بغاوت ہو گئی اور 10 دسمبر کے فیصل آباد کے جلسہ میں پیر حمیدالدین سیالوی کی جانب سے اراکین اسمبلی کے استعفے آگئے تو پھر یہ سلسلہ کم ہونے کے بجائے مزید بڑھ سکتا ہے۔ ن لیگ کے ذرائع کے مطابق فیصل آباد میں 10 دسمبر کا جلسہ روکنے اور پیر حمیدالدین سیالوی کو مطمئن کرنے کے لئے کام شروع کر دیا گیا ہے۔ اراکین اسمبلی کو ناراض ہونے سے روکنے کے لئے وفاق کی طرز پر زیادہ سے زیادہ فنڈز کا لالچ اور ہر ڈسٹرکٹ کے اراکین اسمبلی کے ساتھ خودشہباز شریف کی ملاقاتوں کا سلسلہ شروع کرنے کا فیصلہ کر لیا گیا ہے جبکہ وفاقی اور صوبائی وزراءکو بھی ٹاسک دے دیا گیا ہے۔ وہ مختلف اضلاع میں اراکین اسمبلی کے ساتھ رابطے تیز کریں اور ناراض اراکین کو منانے کی کوشش کریں۔ ذرائع کے مطابق حکومتی مشینری سے بھی اراکین اسمبلی کی نقل و حرکت اور رابطوں کے حوالے سے روزانہ کی بنیاد پر رپورٹ مانگ لی گئی ہے۔ ذرائع کا کہنا ہے کہ پنجاب اور وفاق کے چند اہم ذمہ داران نے شہباز شریف کو بھی تجویز دی ہے کہ پیر حمیدالدین سیالوی کی تحریک شروع ہونے سے ہمیں بہت زیادہ مذہبی ووٹ بینک کا نقصان ہوگا اور بہت زیادہ اراکین اسمبلی بھی ہمیں چھوڑ سکتے ہیں اور اس کے لئے رانا ثناءا اللہ کی اگر قربانی دے دی جائے تو حالات بہتر ہوسکتے ہیں۔ بے شک اس حوالے سے رانا ثناءاللہ بظاہر تو استعفیٰ دے دیں مگر پس پردہ سارے اختیارات انہی کے پاس رہیں گے۔ ذرائع کا کہنا ہے کہ شہبازشریف نے اس حوالے سے مشاورت کرنے کا بھی کہا ہے۔ذرائع کے مطابق رانا ثناءاللہ کا استعفیٰ آخری آپشن کے طور پر رکھنے کا فیصلہ کیا گیا ہے۔
بغاوت کا خدشہ
