اسلام آباد(ویب ڈیسک)تھانہ کھنہ میں تحریک لبیک کے امیر خادم حسین رضوی اور دیگر تین نامزد افرادکے خلاف پولیس اہلکاروں کو مارنے پیٹنے اور اغواء کی کوشش کرنے کا مقدمہ درج کر لیا گیا۔ تفصیلات کے مطابق تھانہ کھنہ پولیس نے وفاقی دارلحکومت اسلام آباد میں جاری دھرنے کے شرکاء کے خلاف ایک اور مقدمہ درج کر لیا ہے ۔ جس میں تحریک لبیک کے امیر سمیت تین دیگر افرادکو نامزد کیا گیا ہے۔ مقدمے میں الزام عائد کیا گیا ہے کہ دھرنے کے شرکاء نے پولیس اہلکار کو مارا پیٹا جس سے وہ زخمی ہو گیا اور پولیس افسر ایس ایچ او تھانہ کورال کو اغواء کر نے کی کوشش کی ۔ تھانہ کھنہ میں پولیس افسر آئی پی الطاف کی مدعیت میں مقدمہ درج کر لیا گیا ہے۔
