29ہزار ووٹروں کے انگوٹھوں کے نشان غائب, سنسنی خیز انکشاف

لاہور (خصوصی رپورٹ) حلقہ این اے 120 میں 29607 ووٹرز کے انگوٹھوں کے نشانات نہ ہونے کی وجہ سے الیکشن کی شفافیت پر سوالیہ نشان پیدا ہوگیا۔29607 ووٹرز کا بائیو میٹرک ریکارڈ نہ ہونے اور محض شناختی کارڈ دیکھ کر ووٹ ڈالنے سے غلطی کے امکانات میں اضافہ ہوگیا۔ اس حوالے سے پولنگ عملہ کو انتہائی احتیاط سے کام کرنا ہوگا کیونکہ ان حالات میں دھاندلی کا خطرہ ہے ۔ ادھر ڈسٹرکٹ الیکشن کمشنر نے اپنے دفتر میں ہائیکورٹ کے حکم پر انگوٹھوں کے نشانات نہ رکھنے والے 29 ہزار ووٹروں کی فہرست بھی آویزاں کر دی ہے جہاں متعلقہ ووٹروں کی جانچ پڑتال کی جاسکتی ہے۔ ضلعی الیکشن کمشنر رحم زادہ نے کہا کہ 29607 ووٹرز کے انگوٹھوں کے نشانات نہیں اور الیکشن کمیشن کو نادرا سے جو لسٹ ملی ہے اس پر الیکشن ہوگا جن لوگوں کے پاس شناختی کارڈ ہیں وہ ووٹ ڈال سکیں گے ، الیکشن کمیشن کا پرانا نظام بائیو میٹرک نہ ہونے کی وجہ سے انگوٹھوں کے نشانات غائب ہیں تاہم دھاندلی کا کوئی امکان نہیں۔