اسلام آباد(مانیٹرنگ ڈیسک)سابق وزیر اعظم نواز شریف کی صاحبزادی مریم نواز نے پاکستان مسلم لیگ(ن) کے کارکنان کو پارٹی کے مخالف پروپیگنڈا کرنے والے میڈیا ہاو¿سز کے خلاف حملوں سے باز رہنے کی ہدایت کردی ہے اور انہیں کہا ہے کہ یہ ہمارا کلچر نہیں ہے۔سماجی رابطوں کی ویب سائٹ ”ٹوئٹر “ ٹوئٹ کرتے ہوئے مریم نواز شریف کا کہنا تھا کہ میری پاکستان مسلم لیگ(ن) کے سپورٹرز سے گزارش ہے کہ وہ اپنی جماعت کے مخالف میڈیا ہاو¿سز پر حملے اور ان اداروں کے رپورٹرز سے بدتمیزی نہ کریں کیوں کہ یہ نہ تو ہماری روایات ہیں اور نہ ہی نواز شریف کی میراث ، اس لئے کسی بھی چینل کے ساتھ غیر ذمہ دارانہ رویہ نہ اپنائیں۔واضح رہے کہ سابق وزیر اعظم کی ریلی کے دوران مسلم لیگ(ن) کے کارکنا ن کی جانب سے نجی ٹی وی چینل کے رپورٹرز کے ساتھ بدتمیزی کی گئی جس کے بعد میڈیا پر لیگی کارکنان کو تنقید کا نشانہ بنایا گیا تھا۔
