مانگٹانوالہ (نمائندہ خبریں) غریدہ فاروقی کے ظلم اور تشدد کا نشانہ بننے والی سونیا اور اہل خانہ خوف و ہراس کا شکار۔ بیمار دادی پوتی کی حالت دیکھ کر مزید بیمار اور غمزدہ۔ کم عمر سونیا خوف کے مارے رات بھر سو نہیں سکتی، عدم تحفظ کے باعث چیخیں مار کر ڈر جاتی اور شور مچاتے ہوئے خود کو کمرے میں بند کر لیتی۔ اہل خانہ خود کو جھوٹے مقدمات میں پھنسائے جانے کے خوف سے پریشان۔ مظلوم کی آواز سننے پر روزنامہ خبریں کے مشکور ہیں۔ تحفظ فراہم کیا جائے سونیا کے والد کا مطالبہ۔ تفصیلات کے مطابق 7 ماہ تک معروف اینکر غریدہ فاروقی کے ظلم اور تشدد کا نشانہ بننے والی کم عمر سونیا جو کہ روزنامہ خبریں کی کاوشوں اور جدوجہد کے بعد اپنے اہل خانہ کے پاس گھر واپس پہنچ چکی ہے تاہم سونیا 7 ماہ تک تشدد اور ظلم کا نشانہ بنے رہنے کے باعث تاحال خوف و ہراس کی شکار ہے اور خوف کے مارے رات کو سو نہیں پا رہی اور ڈر کے باعث چیخیں مار کر رونے لگتی اور خود کو کمرے میں بند کر لیتی ہے۔ سونیا کی ادھیڑ عمر دادی شریفاں بی بی اپنی پوتی کی موجودہ حالت دیکھتے ہوئے مزید بیمار اور غم زدہ ہو کر رہ گئی ہے۔ بچی کی والدہ رضیہ بی بی اور والد منیر احمد نے خبریں کو بتایا کہ ڈر اور خوف کے باعث سونیا بی بی ذہنی دباﺅ کا شکار ہے اور ہر وقت سہمی رہنے کے باعث بیمار پڑتی جا رہی ہے۔ انہوں نے کہا کہ ان کے گھر میں غربت کے ڈیرے ہیں اور موجودہ صورت حال نے انہیں مزید ابتر کر دیا ہے اور ان کا کوئی پرسان حال نہیں۔ انہوں نے کہا کہ غریدہ فاروقی بااثر خاتون ہے اور ہمیں ڈر ہے کہ انہیں اور ان کے خاندان کو جھوٹے مقدمات میں پھنسا کر انہیں جیل بھجوایا یا پولیس مقابلے میں قتل کروا سکتی ہے۔ سونیا کے والد نے اعلیٰ حکام سے تحفظ کا مطالبہ کیا ہے اور سپریم کورٹ سے ازخود نوٹس لینے کی اپیل کی ہے۔
