اسلام آباد (ویب ڈیسک)آئل ٹینکرز ایسوسی ایشن نے اوگرا حکام سے سیکرٹری پٹرولیم کی سربراہی میں ہونے والے مذاکرات کے بعد ہڑتال ختم کرنے پر رضا مندی ظاہر کردی ہے۔ آئل ٹینکرز ایسوسی ایشن کے رہنما یوسف شاہوانی نے کہا ہے کہ شام 4 بجے ملک بھر میں تیل کی ترسیل شروع ہو جائے گی۔تفصیلات کے مطابق آئل ٹینکرز ایسوسی ایشن کی ہڑتال کے تیسرے روز ایسوسی ایشن کے نمائندوں اور اوگرا حکام میں مذاکرات ہوئے۔ مذاکرات کی سربراہی سیکرٹری پٹرولیم نے کی اور یہ اسلام آباد میں ہوئے۔ مذاکرات کے دوران آئل ٹینکرز ایسوسی ایشن نے اپنا پرانا مطالبہ دہرایا اور 2009 کے اوگرا آرڈیننس میں ترمیم کی شرط رکھی۔ اوگرا حکام نے آئل ٹینکرز ایسوسی ایشن کو 15 روز میں آرڈیننس میں ترمیم کا کام شروع کرنے کی یقین دہانی کرائی جس کے بعد ایسوسی ایشن نے ملک گیر ہڑتال ختم کرنے پر رضا مندی ظاہر کردی۔ دوسری جانب ایسوسی ایشن نے اوگرا حکام کی گاڑیوں کو فٹ رکھنے کی شرط بھی مان لی ہے۔
