اسلام آباد(انوار زیدی سے) سپریم کورٹ سے وزیر اعظم نواز شریف کو نااہل قرار دیئے جانے کے بعد وزیر داخلہ چوہدری نثار علی خان کو لیڈر آف دی ہاﺅس بنانا چاہیے یہ بات معروف قانون دان سابق سینیٹر اور مسلم لیگی راہنما سید ظفرعلی شاہ نے خبریں سے خصوصی بات چیت کرتے ہوے کہی انہوں نے کہا کہ وزیر اعلیٰ شہباز شریف کی اسلام آباد آمد بظاہر تو غیر رسمی اجلاس میں شرکت تھی لیکن اندرونی ذرائع کے مطابق انہیں چوہدری نثار علی خان اور وزیر اعظم نواز شریف کے مابین دوریوں کو قربت میں بدلنے کے لیے بلایا گیا تھا۔ انہوں نے امید ظاہر کی کہ چونکہ شہباز شریف اور چوہدری نثار کے درمیان دوستی خاصی مضبوط اور عزت و احترام کا تعلق ہے اسی سبب انہیں یہ ٹاسک دیا گیا کہ وہ کسی طرح بھی چوہدری نثار کو راضی کر لینگے انہوں نے کہا کہ چوہدری صاحب کے تحفظات دور کر دیے جائیں تو ان کو بھی راضی ہوجانا چاہیے اور انہیں ہی وزیر اعظم بنانا چاہیے تاکہ مسلم لیگ (ن) کو ایک مضبوط قیادت مل جائے جو پارٹی کو کسی بھی بحران سے محفوظ رکھنے کی اہل ہو گی۔
