اسلام آباد، لاہور (مانیٹرنگ ڈیسک، خصوصی نامہ نگار) ن لیگ نے ہزاروں خواتین کو اسلام آباد پہنچانے کا ٹاسک دیدیا۔ مریم نواز کی پیشی کے موقع پر ہنگامہ کھڑا کیا جانے کا پروگرام ہے۔ یہ انکشاف سینئر صحافی نے نجی ٹی وی پروگرام میں گفتگو کرتے ہوئے کہا انہوں نے مزید بتایا کہ 10سے 15ہزار خواتین کو اسلام آباد میں پہنچانے کا ٹاسک لیگی رہنماﺅں کو دیدیا گیا ہے۔ یہ خواتین مریم نواز کی پیشی کے موقع پر زبردستی جے آئی ٹی دفتر میں گھسنے کی کوشش کرینگی اور مزاحمت پر شور مچایا جائے گا کہ خواتین کے ساتھ بدتمیزی کی گئی۔ حکومت کی جے آئی ٹی میں پیشی متوالوں نے کمر کس لی ،بلدیاتی نمائندوں نے تیاریاں شروع کرتے ہوئے 5 جولائی کو اسلام آباد میں ڈیرے جمانے کیلئے ٹیمیں تشکیل دینے شروع کر دی ہیں ۔بتایا گیا ہے کہ وزیر اعظم پاکستان کی بیٹی مریم نواز کی ممکنہ پیشی کے پیش نظر بلدیاتی نمائندوں سمیت متوالوں کی بڑی تعداد نے اسلام آباد میں ڈیرے جمانے اور مریم نواز کے حق میں ریلی نکالنے کیلئے تیاریاں شروع کردی ہیںاس حوالے سے بلدیاتی نمائندوں کا کہنا ہے کہ مریم نواز قوم کی بیٹی ہے اور اس کی حرمت اور تحفظ کے ساتھ یہ ثابت کریں گے کہ شریف خاندان سے ہماری ہمدردیاں اور مکمل ساتھ کی یقین دہانی ہے اس حوالے سے بلدیاتی نمائندوں چیئر مین و وائس چیئرمینوں سمیت کونسلروں کی بڑی تعداد نے اپنی اپنی یونین کونسلوں میں کمیٹیاں بنائی ہیں اس حوالے سے بلدیاتی نمائندوں کا کہنا ہے کہ وہ کسی بھی طرح سرکاری وسائل کو استعمال نہیں کریں گے بلکہ اپنی قوم کی بیٹی کے ساتھ اظہار ہمدردی کرتے ہوئے اپنے ذاتی وسائل کو استعمال کرکے اسلام آباد پہنچیں گے ۔
