لاہور (خصوصی رپورٹ)بھارت کی طرف سے پاکستان کو عدم استحکام کا شکار کرنے کیلئے ایک اور ”گریٹر پلان“ کی سازش کا انکشاف ہوا ہے، انٹیلی جنس اطلاعات کے مطابق اس سازش کے تحت بھارت افغانستان اور ایران سے ملکر ایک بار پھر پاکستان کیخلاف محدود جنگ کرنے کی منصوبہ بندی کررہاہے جس کے تحت افغانستان ، بھارت اور پھر ایران پاکستان سے ملحقہ سرحدوں میں خلاف ورزیاں کرتے ہوئے پاکستانی فورسز اور شہریوں کو نشانہ بنائیں گے جس کے بعد پاکستان کے رینجرز، فوج اور سکیورٹی کے ادارے سرحدوں میں مصروف ہونگے جس سے پاکستان کی افواج پر دباﺅ بڑھے گا۔ پاک فوج نے انٹیلی جنس کی اطلاعات پر ہمسایہ ممالک کی محدود جنگ کا موثر جواب دینے کیلئے موثر حکمت عملی اختیار کی ہے۔ ذرائع کا کہناہے کہ بھارتی جاسوس گلبھوشن یادیو نے گرفتاری کے بعد دوران تفتیش انکشاف کیا تھا کہ بھارت پاکستان میں محدود جنگ کی منصوبہ بندی کرچکاہے اور اس سازش میں امریکا، اسرائیل، بھارت، افغانستان اور ایران کے علاوہ پاکستان کی بعض سیاسی شخصیات بھی شامل ہیں، جس کے باعث بھارت ستمبر 2016ءمیں بھی سرحدی خلاف ورزیوں میں تیزی لے آیا تھا لیکن اس کے گریٹر پلان پر عمل نہ ہوسکا۔ اسلام آباد کے اہم حلقوں کے مطابق بھارت کی بدنام زمانہ خفیہ ایجنسی ”را“ نے افغانستان میں متعدد حملے کرائے جس کا الزام پاکستان پر عائد کرایاگیا۔ بھارت نے کابل انتظامیہ کو پاکستان کیخلاف چھیڑخانی پر اکسایا جس پر افغان فورسز نے چمن اور طور خم بارڈر اور سرحدی علاقوں میں خلاف ورزیاں کرتے ہوئے گولہ باری اور فائرنگ کرکے متعدد شہریوں کو شہید اور سکیورٹی فورسز اور دیگر شہریوں کو زخمی کردیا۔ پاکستان کی سکیورٹی فورسز کی جوابی کارروائی پر افغان فورسز کو بھاری نقصان اٹھانا پڑا۔ اس کارروائی کا مقصد پاکستان کو غیر مستحکم کرنا ہے جبکہ بھارت سمیت صیہونی طاقتیں پاکستان کے سی پیک منصوبے کو ناکام بناناچاہتی ہیں کیونکہ وہ سمجھتے ہیں کہ اگر پاکستان سی پیک مکمل کرنے میں کامیاب ہوگیا تو وہ بڑی معاشی قوت بن کر ابھرے گا اور فوجی اعتبار سے پاکستان پہلے ہی بہت مضبوط ہے۔ پاکستان کی عسکری قیادت دشمنوں کی چالوں سے بخوبی آگاہ ہے اور سرحدوں پر انتہائی چوکس ہیں۔
واشنگٹن (خصوصی رپورٹ) پاکستان کی مغربی سرحدوں پر افغانستان اور ایران کے ساتھ بڑھتی کشیدگی کو کم کرنے کیلئے امریکہ نے تعاون کی پیشکش کردی، اس سلسلے میں امریکہ نے یقین دہانی کرائی ہے کہ افغانستان کی سرزمین پاکستان کے خلاف ہرگز استعمال نہیں ہونے دینگے، امریکہ کی یہ پیشکش اس وقت سامنے آئی ہے جب ایران نے غیر قانونی بارڈر کراسنگ پر پاکستان کے خلاف حملے کا عندیہ دیا ہے۔ ذرائع کے مطابق افغانستان کے پاکستانی سرحدی علاقوں پر حملے کے بعد امریکی حکام کو پاکستان نے پنی تشویش سے آگاہ کیا تھا۔ امریکہ اس صورت حال میں پاکستان کے ساتھ قریبی رابطے میں ہے، دہشت گردی کے خاتمے اور امن و امان کے قیام کے لیے امریکہ نے پاکستان کو ہر ممکن تعاون کا یقین دلایا۔ امریکہ میں پاکستانی سفیر عزیز احمد چودھری نے کہا کہ پاکستان امریکہ کے ساتھ ملکر افغانستان میں قیام امن کیلئے ہر ممکن مدد کو تیار ہے۔ انہوں نے ہمسایہ ملک سے کہا کہ وہ اپنی سرزمین پاکستان کے خلاف استعمال نہ ہونے دے۔
