کراچی (مانیٹرنگ ڈیسک) سابق صدر آصف علی زرداری کے قریبی ساتھی غلام قادر مری لاپتہ ہو گئے ہیں جبکہ ان کی گاڑی جامشورو کے قریب سے ملی ہے تاہم ان کا تاحال کوئی علم نہیں ہو سکا ہے۔ تفصیلات کے مطابق ایک ہی ہفتے میں آصف علی زرداری کے تین قریبی ساتھی نواب لغاری، اشفاق لغاری اور غلام قادر مری لاپتہ ہو گئے ہیں۔ سندھ حکومت کے سابق مشیر اور سابق صدر کے قریبی ساتھی نواب لغاری اسلام آباد سے لاپتہ ہوئے تھے جن کے بعد اومنی گروپ کے کنسلٹنٹ اشفاق لغاری بھی کراچی سے پراسرار طور پر لاپتہ ہو گئے۔ ذرائع کے مطابق اسی ہفتے میں ان کے تیسرے قریبی دوست غلام قادر مری بھی لاپتہ ہو گئے ہیں تاہم ان کی گاڑی جامشورو کے قریب سے مل گئی ہے۔ پراسرار گمشدگیوں نے سندھ کے سیاسی حلقوں میں کھلبلی مچا دی ہے اور بالخصوص پیپلز پارٹی کے کئی رہنماحیران و پریشان ہیں۔
