لاہور (کرائم رپورٹر) سانحہ بیدیاں روڈ میں جائے وقوعہ سے ملنے والی موٹر سائیکل کا ریکارڈ ایکسائز سے طلب کر لیا جبکہ خودکش حملہ آور کی اُنگلیاں فرانزک لیب سے نادرا آفس بھجوادی گئیں۔ ذرائع کے مطابق سانحہ بیدیاں روڈ میں جائے وقوعہ سے ملنے والی موٹر سائیکل کا ریکارڈ ایکسائز سے طلب کر لیا گیا۔ جائے وقوعہ سے ملنے والی موٹر سائیکل نمبر LEV-6982کے متعلق محکمہ ایکسائز کی جانب سے جو ریکارڈ پولیس کو فراہم کیا گیا ہے اس کے مطابق موٹر سائیکل مغلپورہ کے رہائشی عبدالوحید نامی شہری کے نام پر رجسٹرڈ ہے تاہم اس حوالے سے حقائق کو خفیہ رکھا جارہا ہے کہ موٹر سائیکل جائے وقوعہ پر کیسے پہنچی۔ دوسر جانب باوثوق ذرائع کا کہنا ہے کہ خودکش حملہ آور کی دو اُنگلیاں فرانزک لیب سے نادرا آفس بھجوائی گئیں ہیںتاکہ اگراسکا نادرا میں کوئی ریکارڈ ہو تو اس کے دیگر اہل و عیال اور ساتھیوں تک رسائی حاصل کی جاسکے۔
