کراچی (آئی ایف پی، مانیٹرنگ ڈیسک) سندھ کی صوبائی کابینہ نے آئی جی سندھ اے ڈی خواجہ کو تبدئل کرنے کی منظوری دے دی۔ تفصیلات کے مطابق وزیر اعلیٰ سندھ سید مراد علی شاہ کی زیر صدارت صوبائی کابینہ کا ہنگامی اجلاس ہوا جس میں آئی جی سندھ اے ڈی خواجہ کو تبدیل کرنے پر کابینہ کو اعتماد میں لیا گیا۔ صوبائی کابینہ نے آئی جی سندھ کو تبدیل کرنے کی اصولی منظوری دے دی۔ واضح رہے کہ کچھ روز پہلے سندھ حکومت نے آئی جی اے ڈی خواجہ کو تبدیل کردیا تھا تاہم سندھ ہائیکورٹ نے یہ فیصلہ واپس لینے کا حکم دیتے ہوئے ہدایت کی تھی کہ آئی جی کو ہٹانے کیلئے صوبائی کابینہ سے منظوری لی جائے۔ سندھ ہائیکورٹ کے حکم پر صوبائی کابینہ سے آئی جی کو ہٹانے کی منظوری لے لی گئی ہے۔سندھ ہائیکورٹ میں آئی جی سندھ کی تبدیلی کے کیس کی سماعت ہوگی جس میں سندھ حکومت کی جانب سے صوبائی کابینہ کا فیصلہ پیش کیا جائے گا۔ آئی جی سندھ اے ڈی خواجہ ایک بار پھر سندھ حکومت کے سامنے ڈٹ گئے، عہدے سے ہٹائے جانے کے احکامات ماننے سے انکار کردیا اور کہا کہ عدالتی حکم یا اسٹیبلشمنٹ ڈویژن کی منظوری پرچارج چھوڑ وں گا۔ بدھ کونجی ٹی وی کے مطابق بدھ کو آئی جی سندھ اے ڈی خواجہ نے سندھ کابینہ کے احکامات ماننے سے انکار کردیا اور کہا کہ عدالتی حکم ملا تو چارج چھوڑ دوں گا،پھر اسٹیبلشمنٹ ڈویژن اگر منظوری دے گی تو فوری طور پر چلا جاﺅں گا۔واضح رہے کہ اس سے قبل سندھ کابینہ نے اے ڈی خواجہ کو ہٹانے کی منظوری دے دی تھی اور نئے آئی جی کیلئے سردار عبدالحمید دستی کے نام پر اتفاق کیا گیا۔قبل ازیں دو بار سندھ حکومت اے ڈی خواجہ کو عہدے سے ہٹانے کی کوششیں کرچکی ہے مگر ہائیکورٹ نے انہیں دونوں بار عہدے پر بحال کیا۔ پاکستان پیپلزپارٹی کے رہنما مولا بخش چانڈیو نے کہا ہے کہ اے ڈی خواجہ سے سندھ حکومت کی نہیں بن رہی۔ اگر وہ اتنے اچھے افسر ہیں تو پنجاب میں تعینات کر دیں۔ نجی ٹی وی کے پروگرام میں گفتگو کرتے ہوئے مولا بخش چانڈیو نے کہا کہ حکومت نے 4سال کیا کیا صرف الیکشن کی تیاری کر رہی ہے۔ لاڑکانہ میں 90 ارب کے ترقیاتی فنڈ کی بات جھوٹ ہے۔ انہوں نے کہا کہ اے ڈی خواجہ کی سندھ حکومت سے نہیں بن رہی انہیں ملازمتوں اور ترقیوں پر اعتراض تھا۔ اے ڈی خواجہ صوبائی حکومت کی پالیسی پر نہیں چل رہے تھے اگر وہ اتنے اچھے افسر ہیں تو پنجاب میں تعینات کر دیں۔
