اسلام آباد (آئی این پی) وزیراعلیٰ پنجاب شہباز شریف اور وفاقی وزیر داخلہ چودھری نثار علی خان سے چیف آف جنرل سٹاف لیفٹیننٹ جنرل بلال اکبر نے ٹیلیفونک رابطہ کرکے دہشت گردی کے واقعات کی روک تھام کے لئے سول ملٹری تعاون پر مشاورت کی اس موقع پر وفاقی وزیر داخلہ چودھری نثار علی خان نے لاہور بیدیاں روڈ پر مردم شماری ٹیم پر حملے کی شدید مذمت کرتے ہوئے کہا کہ اس بات پر توجہ ہونی چاہئے کہ انٹیلی جنس رپورٹس کے باوجود واقعہ کس طرح ہوا۔ وفاقی وزیر داخلہ نے لاہور میں مردم شماری ٹیم پر حملے کی مذمت کرتے ہوئے واقعے کی رپورٹ طلب کر لی۔ وزیر داخلہ نے نادرا اور ایف آئی کو پنجاب حکومت اور ملٹری حکام کو واقعے کی تفتیش کے سلسلے میں فارنزک تعاون فراہم کرنے کی ہدایت کی۔ انہوں نے پاک فوج کے شہید جوانوں کو خراج عقیدت پیش کرتے ہوئے سویلین شہیدوں اور زخمیوں کے خاندانوں سے اظہار ہمدردی کیا۔ دوسری جانب چیف آف جنرل سٹاف لیفٹیننٹ جنرل بلال اکبر نے وزیر داخلہ چودھری نثار علی خان سے ٹیلیفونک رابطہ کیا جس میں دہشت گردی کے ایسے واقعات کی روک تھام کے لیے سول ملٹری میں تعاون پر مشاورت کی گئی۔ اس موقع پر وزیر داخلہ نے کہا کہ اس بات پر توجہ ہونی چاہیے کہ انٹیلی جنس رپورٹس کے باوجود واقعہ کس طرح ہوا۔
