لو میرج کی خواہش ، بھائی نے بہن کو وحشیانہ تشدد کے بعد اگلے جہان پہنچا دیا

کمالیہ(ویب ڈیسک) صوبہ پنجاب کے شہر کمالیہ میں بھائی نے بہن کو پسند کی شادی کی خواہش پر بہیمانہ انداز میں قتل کردیا۔بھائی کے ہاتھوں بہن کی ہلاکت کا یہ واقعہ کمالیہ کے علاقہ محلہ سرائے ڈوگر میں پیش آیا۔پولیس کے مطابق ثوبیہ نامی لڑکی پسند کی شادی کرنا چاہتی تھی جبکہ اس کا بھائی طاہر اس رشتے پر مسلسل انکاری تھا۔ضد کرنے پر طاہر نے ثوبیہ کو ٹانگ میں گولی مار کر زخمی کیا اور پھر گھر کے ایک کمرے میں بند کردیا۔فائرنگ سے زخمی ہونے والی ثوبیہ ایک مہینے تک کمرے میں تڑپتی رہی لیکن اس کے بھائی کو بہن پر رحم نہ آیا اور بالآخر ثوبیہ آج دم توڑ گئی۔ثوبیہ کی ہلاکت کے بعد ملزم طاہر گھر سے فرار ہوگیا۔پولیس نے لڑکی کی لاش کو پوسٹ مارٹم کے لیے ڈی ایچ کیو اسپتال منتقل کردیا۔دوسری جانب ملزم طاہر کے خلاف مقدمہ درج کرلیا اور اس کی تلاش میں چھاپے مارے جارہے ہیں۔رواں ماہ 13 اپریل کو بھی جہلم کی تحصیل پنڈ دادن خان میں پسند کی شادی کی خواہشمند ایک لڑکی کو مبینہ طور پر غیرت کے نام پر قتل کردیا گیا تھا۔پنجاب سمیت ملک بھر میں خواتین کو غیرت کے نام پر قتل کرنے کے واقعات سامنے آتے رہتے ہیں اور ہر سال سیکڑوں خواتین کو ان کے اپنے ہی پیارے غیرت کے نام پر زندگی سے محروم کردیتے ہیں۔