All posts by Faisal Khan

ٹوئٹر میں کووڈ ویکسینز کے خلاف گمراہ کن تفصیلات کی روک تھام کیلئے نئے اقدامات

ٹوئٹر نے کووڈ 19 ویکسینز کے حوالے سے گمراہ کن تفصیلات شیئر کرنے پر ٹوئٹس پر لیبلز لگانے کا اعلان کیا ہے۔

ان لیبلز میں ایسے قابل اعتبار اداروں کے لنکس بھی شامل کیے جائیں گے جہاں سے ویکسینز کے حوالے سے مستند تفصیلات مل سکیں گی۔

ٹوئٹر کی جانب سے لیبلز کے ساتھ ایک نئے 5 اسٹرائیک سسٹم کا نفاذ بھی کیا جائے گا جس کے تحت بار بار اصولوں کی خلاف ورزی پر اکاؤنٹس کو لاک اور مستقل بنیادوں پر معطل کیا جاسکے گا۔

یہ نئے لیبلز فیس بک کے اینٹی مس انفارمیشن بینرز سے ملتے جلتے ہوں گے۔

جن ٹوئٹس پر یہ لیبل موجود ہوگا ان کے نیچے ٹیکسٹ میں مستند ذرائع کی تفصیلات پر مبنی لنکس یا ٹوئٹر کے اصول و ضوابط کو درج کیا جائے گا۔

کمپنی کا کہنا تھا کہ ان لیبلز کا اطلاق انسانوں اور خودکار ریویو سسٹمز کے امتزاج سے کیا جائے گا اور سب سے پہلے انگلش زبان کے مواد کو پروگرام کا حصہ بنایا جارہا ہے۔

ٹوئٹر کی جانب سے کووڈ 19 کی گمراہ کن تفصیلات کے حوالے سے پالیسی موجود ہے جس کے تحت مخصوص کیٹیگریز کو ہدف بنایا جاتا ہے۔

ان اہداف میں وائرس کی بنیاد کے حوالے سے گمراہ کن تفصیلات، علاج اور احتیاطی اقدامات کی افادیت کے بارے میں جھوٹی خبریں، وائرس کے پھیلاؤ ، بیماری کے خطرے یا موت کے حوالے سے گمراہ کن تفصٰلات جبکہ اداروں یا طبی عہدیداران کے خلاف گمراہ کن تفصیلات شامل ہیں۔

لیبلز کو کووڈ 19 کی مس انفارمیشن کے حوالے سے نئے اسٹرائیک سسٹم کا بھی حصہ بنایا جائے گا، ایک لیبل ٹوئٹر کو ایک اسٹرائیک کے طور پر گنا جائے گا۔

اگر کمپنی نے تعین کیا کہ یہ تفصیلات کووڈ 19 کے علاج کے حوالے سے خطرناک ہیں اور سازشی خیالات کے پھیلاؤ کا باعث بن سکتی ہے، تو اس ٹوئٹ کو ڈیلیٹ بھی کیا جاسکتا ہے، جس کو 2 اسٹرائیک تصور کیاج ائے گا۔

اس کے بعد ہر اسٹرائیک پر ٹوئٹر کی جانب سے مختلف اقدامات کیے جائیں گے۔

آسان الفاظ میں ایک اسٹرائیک پر نو اکاؤنٹ لیول ایکشن، 2 اسٹرائیک پر 12 گھنٹے تک اکاؤنٹ لاک ہوگا، 3 اسٹرائیک پر 12 گھنٹے کے لیے اکاؤنٹ لاک، 4 اسٹرائیک پر 7 دن کے لیے اکاؤنٹ لاک ہوگا جبکہ 5 یا اس سے زیادہ اسٹرائیکس پر اکاؤنٹس ہمیشہ کے لیے معطل ہوجائے گا۔

بلال سعید اور مومنہ مستحسن کے ‘باری’ کا 10 کروڑ ویوز کا ریکارڈ

معروف گلوکارہ مومنہ مستحسن اور بلال سعید نے نومبر 2019 میں اپنا پہلا گانا ‘باری’ ریلیز کیا تھا، جس نےکامیابی کے نئے ریکارڈز بنائے تھے۔

اور اب اس گانے نے ایک اور نیا ریکارڈ بنایا ہے اسے اب تک یوٹیوب پر 10 کروڑ سے زائد مرتبہ دیکھا جاچکا ہے۔

گانے کی ویڈیو میں بلال اور مومنہ کی رومانوی کہانی کو پیش کیا گیا تھا جبکہ اس کی شوٹنگ لاہور میں کی گئی تھی۔

ویڈیو میں دکھایا گیا تھا کہ بلال بیرون ملک سے واپس آئے ہیں اور مومنہ کی ایک جھلک دیکھنے کو بےتاب ہیں۔

—اسکرین شاٹ/ یوٹیوب
—اسکرین شاٹ/ یوٹیوب

اس گانے میں یوٹیوبر رحیم پردیسی کو بھی کچھ مناظر کے لیے شامل کیا گیا تھا۔

بعدازاں گزشتہ برس ‘باری’ کو ایک سال مکمل ہونے پر دونوں گلوکاروں نے اعلان کیا تھا کہ وہ جلد ہی گانا کا ریمیک بھی ریلیز کریں گے۔

یہ بھی پڑھیں: مومنہ مستحسن کا ایک اور گانا ‘باری’ سامنے آگیا

ریلیز ہوتے ہی ‘باری 2’ کو بہت زیادہ پسند کیا گیا تھا اور صرف 2 گھنٹے میں اس گانے کو ایک لاکھ 97 ہزار سے زائد مرتبہ دیکھا جاچکا تھا۔

باری 2 کو پہلے حصے سے آگے بڑھتے ہوئے دکھایا گیا ہے کہ مومنہ مستحسن غلط فہمی کی بنیاد پر ناراض ہوجاتی ہیں اور گانے کے آخر میں اس ناراضی کو ختم ہوتے بھی دکھایا گیا ہے۔

پی ایس ایل 6؛ مزید 3 کورونا کے مریض سامنے آگئے، تعداد 4 ہوگئی

کراچی: اسلام آباد یونائیٹڈ کے فواد احمد کے بعد پی ایس ایل 6  کے بائیو سیکور ببل میں مزید تین کورونا کے مریض سامنے آگئے۔

پی سی بی کے ڈائریکٹر میڈیا سمیع برنی نے ہنگامی پریس کانفرنس کرتے ہوئے کہا کہ آج ہونے والے میچ میں تما شائیوں کے لیے ایس او پی پر نظرثانی ہوگی،آرگنائزنگ کمیٹی اہم فیصلے کرے گی اور جمعرات کو ایک بار پھر ٹیسٹ کیے جائیں گے، بائیو سیکور ببل میں کوئی کمی نہیں چھوڑی گئی۔ گراونڈ اسٹاف کو بھی کہا گیا ہے کہ وہ ایس او پیز پر سختی سے عمل درآمد کریں، فرنچائز اونرز بھی ٹیسٹ منفی آنے کے بعد ٹیم کو جوائن کر رہے ہیں، پچاس فیصد کراؤڈ کو بھی آنے کی اجازت ہو گی۔

سمیع برنی کا کہنا تھا کہ بائیو سیکور ببل کےلیےبہترین انتظامات کیے گئے تھے، آج شام کا میچ شیڈول کے مطابق ہوگا، اب تک 244 پی سی آر ٹیسٹ کروائے گئے ہیں، ان  میں سے تین پازیٹیو آئے ہیں۔ ٹیسٹ پازیٹیو آنے والوں میں دو غیر ملکی کھلاڑی اور ایک سپورٹنگ اسٹاف شامل ہے۔ ایک کھلاڑی کا تعلق اسلام آباد یونائیٹڈ سے ہے، کورونا پازیٹیو آنے والوں کو قرنطینہ کر دیا گیا ہے، براڈ کاسٹنگ کریو میں شامل 100 سے زائد عملے کا ٹیسٹ کروائے گئے ہیں۔

ڈائریکٹر میڈیا پی سی بی نے کہا کہ پی ایس ایل کی ٹکینکل ٹیم فرنچائز اونرز کے ساتھ میٹنگ کر رہی ہیں، تمام ٹیموں کو ایس او پیز پر عمل درآمد کرنے کا کہا گیا ہے، چیلنجز کا سامنا کر رہے ہیں، کوشش ہوگی کہ مزید کیسز سامنے نہ آ ئیں، تماشائیوں کا کھلاڑیوں سے رابطے  نہیں ہوتے، این سی او سی اب تک پچاس فی صد تماشائیوں کو اسٹیڈیم آنے کی اجازت کے فیصلے پر قائم ہے، سامنے آنے والے مریضوں کے نام ظاہر نہیں کیے جاسکتے،کورونا کے مریضوں  کےاہل خانہ سے رابطہ ہے،ببل میں تین سو افراد ہیں، جن کے ٹیسٹ مثبت آئے وہ دس دن قرنطینہ میں رہیں گے، ہر چوتھے دن پی آر سی ٹیسٹ ہوں گے،ببل میں ایسے واقعات ہوجاتے ہیں،ببل کو توڑنے کی باتوں میں صداقت نہیں ،مشکل حالات کاسامنا کر رہے ہیں،ایونٹ کو احسن انداز میں آگے لے جارہے ہیں،ببل میں آنے والا پروٹوکول سے گزر کر آتا ہے، اب سخت انتظامات کرنا ہوں گے۔

جنوبی پنجاب صوبہ وفاق کی مظبوتی کی علامت: امتنان شاہد

پی ٹی آئی کے نو منتخب سینیٹر عون عباس بپی نے گزشتہ روزخبریں” گروپ آفس ملتان میں امتنان شاہد سے ملاقات کی

صوبہ جنوبی پنجاب کیلئیے آواز بلند کرنے پر پی ٹی آ ئی رہنما نے”خبریں” کو خراج تحسین پیش کیا

16 مارچ تک PSL میچز 50 فیصد تماشائیوں کے ساتھ ہی ہوں گے، پی سی بی

کراچی: پاکستان کرکٹ بورڈ کا کہنا ہےکہ پی ایس ایل کے 16 مارچ تک کے میچز 50 فیصد تماشائیوں کےساتھ ہی ہوں گے۔

پی سی بی کے ڈائریکٹر میڈیا سمیع الحسن برنی نے پریس کانفرنس میں بتایا کہ فواد احمد اور تین لوگ جو کورونا سے متاثر ہوئے ہیں وہ 10 روز تک قرنطینہ میں رہیں گے، ان کے دوبارہ جمعرات کو ٹیسٹ کیے جائیں گے۔

انہوں نے کہا کہ 244 ٹیسٹ میں سے تین کیسز مثبت آئے جنہیں فوری قرنطینہ کردیا، نیشنل اسٹیڈیم اور براڈ کاسٹنگ اسٹاف کے بھی ٹیسٹ کیے جارہے ہیں، اس وقت بائیو سکیور ببل میں 300 لوگ ہیں۔

ڈائریکٹر میڈیا کا کہنا تھا کہ پی ایس ایل کی ساکھ کو برقرار رکھنے کے لیے ہر ممکن کوشش کررہے ہیں، ہوٹل اور گراؤنڈ سمیت سب جگہ سخت کوشش کررہے ہیں، آج تین بجے ایک ورچوئل کانفرنس ہورہی ہے جس میں بہت ساری چیزوں پر فیصلے ہوں گے۔

انہوں نے مزید کہا کہ 50 فیصد تماشائی میدان میں آئیں گے، فائنلز کا فیصلہ بعد میں ہوگا، 16 مارچ تک کےمیچز 50 فیصد تماشائیوں کے ساتھ ہوں گے۔

قابل شناخت بیلٹ پیپرز چھاپیں ،PTIوفد الیکشن کمیشن آفس پہنچ گیا

 سینیٹ الیکشن صدارتی ریفرنس میں سپریم کورٹ کے فیصلے کے بعد حکومتی وفد نے فوری طور پر الیکشن کمیشن سے رجوع کرلیا۔

وفاقی وزراء پر مشتمل حکومتی وفد الیکشن کمیشن پہنچا اور چیف الیکشن کمشنر اور ممبران سے ملاقات کرکے فیصلے پر قانونی نکات سے آگاہ کیا۔ انہوں نے کہا کہ سینیٹ الیکشن میں شفافیت کی ضرورت ہے۔ بابر اعوان، شہزاد اکبر، شفقت محمود، فیصل جاوید، وفاقی وزیر فواد چوہدری اور آئینی ماہرین وفد میں شامل تھے۔

بعد ازاں الیکشن کمیشن کے باہر میڈیا سے گفتگو کرتے ہوئے وفاقی وزیر فواد چوہدری نے کہا کہ حکومت نے الیکشن کمیشن کو حمایت کا یقین دلایا ہے اور سپریم کورٹ کے فیصلے پر من و عن عملدرآمد کی ضرورت پر زور دیا ہے، سپریم کورٹ نے کہا ہے سینیٹ انتخابات خفیہ ہوگا لیکن شکایات پر الیکشن کمیشن ووٹ کو دیکھ سکے گا اور شناخت کرسکے گا، سپریم کورٹ کا فیصلہ ہے کہ ووٹ قابل شناخت ہوگا، اس حوالے سے 1500 بیلٹ پیپرز چھاپنے کی ضرورت ہے، الیکشن کمیشن کو تمام ٹیکنالوجی فراہم کر سکتے ہیں، الیکشن کمیشن نے فیصلہ کرنا ہے، دو گھنٹے میں بیلٹ پیپر چھپ جائیں گے، چیف الیکشن کمشنر کی سربراہی میں اعلی سطح اجلاس عدالتی رائے پر غور کر رہا ہے جس میں ووٹ کی شناخت کے بارے میں فیصلہ کیا جائیگا۔

بابر اعوان نے بتایا کہ سپریم کورٹ کے شارٹ آرڈر پر الیکشن کمیشن میں مشاورت ہوئی،عدالت نے کہا ہے ووٹ ہمیشہ خفیہ نہیں رہ سکتا، شفاف الیکشن کرانا الیکشن کمیشن کی ذمہ داری ہے، پاکستان کی تاریخ میں شفاف انتخابات کے حوالے سے یہ فیصلہ کن مرحلہ ہے، 1500 لوگوں کے ووٹوں کی شناخت کی بات کی گئی۔

شفقت محمود نے کہا کہ بیلٹ پیپرز کی شناخت سے سینیٹ الیکشن میں ووٹوں کی خریدوفروخت کو روکا جاسکتا ہے، ریفرنس پر سپریم کورٹ کی رائے ہی تحریک انصاف کا موقف ہے۔

چوروں،لٹیروں کو ووٹ دینا ہے تو پھر کیا فرق رہ جائیگا:عمرا ن خان

 وزیراعظم عمران خان نے کہا ہے کہ سینیٹ الیکشن سے متعلق سپریم کورٹ کا فیصلہ خوش آئند ہے، بیلٹ پیپر کی شناخت سے ہارس ٹریڈنگ ختم ہوگی،مجھے پتا ہے اپوزیشن ارکان سے رابطے کررہی ہے، اگر لٹیروں کو ہی ووٹ دینا ہے تو پھر کیا فرق رہ جائے گا؟تفصیلات کے مطابق وزیراعظم عمران خان سے ارکان اسمبلی نے ملاقاتیں کیں، جس میں وزیر اعظم نے ارکان اسمبلی کے مسائل سنے اور سینیٹ الیکشن سے متعلق حکمت عملی سے آگاہ کیا۔وزیراعظم عمران خان نے گفتگو کرتے ہوئے کہا کہ سپریم کورٹ کا فیصلہ خوش آئند ہے، بیلٹ پیپر کی شناخت سے ہارس ٹریڈنگ ختم ہوگی۔انہوں نے ارکان اسمبلی کو مخاطب کرتے ہوئے کہا کہ مجھے پتا ہے اپوزیشن آپ سے رابطے کررہی ہے۔

اگر لٹیروں کو ہی ووٹ دینا ہے تو پھر آپ میں اور ان میں کیا فرق رہ جائے گا؟ارکان اسمبلی کی ترقیاتی اسکیموں کو ترجیحی بنیادوں پر مکمل کریں گے۔

اس موقع پر پارٹی رہنماء عامر ڈوگر نے وزیراعظم سے استفسار کیا کہ یوسف رضا گیلانی نے ہم سمیت آپ سے بھی ووٹ مانگا ہے ، جس کے جواب میں وزیر اعظم نے کہا کہ اب یہ ووٹ کی صورت میں مجھ سے این آراو لینا چاہتے ہیں۔ عمران خان نے کہا کہ ضمیر بھی کوئی چیز ہوتی ہے اس کی سنیں۔جو مرضی کرلیں ان کے سامنے نہیں جھکوں گا۔جانتا ہوں مہنگائی کے مسائل ہیں مگر ان چیلنجز پر قابو پائیں گے۔واضح رہے سپریم کورٹ آف پاکستان نے سینیٹ الیکشن میں اوپن بیلٹ سے متعلق رائے دی ہے کہ سینیٹ انتخابات خفیہ ہی ہوں گے۔ سپریم کورٹ نے یہ رائے صدارتی ریفرنس پر سنائی۔ عدالت نے صدارتی ریفرنس پر رائے چار ایک کے تناسب سے سنائی۔ جسٹس یحییٰ آفریدی نے رائے سے اختلاف کیا۔ سپریم کورٹ نے سینیٹ انتخابات میں ووٹنگ پرصدارتی ریفرنس پر اپنی رائے دیتے ہوئے کہا کہ سینیٹ انتخابات اوپن بیلٹ سے نہیں کروائے جا سکتے۔سینیٹ انتخابات قانون کی بجائے آئین کے مطابق ہوں گے اور آئین کے آرٹیکل 226 کے تحت سینیٹ الیکشن خفیہ ہوں گے ، انتخابی عمل سے کرپشن ختم کرنا اور شفاف انتخابات کرانا الیکشن کمیشن کی ذمہ داری ہے ، کرپٹ پریکٹسز روکنے کیلئے الیکشن کمیشن جدید ٹیکنالوجی کی مدد لے سکتا ہے ، تمام ادارے الیکشن کمیشن کی معاونت کریں، ووٹ ہمیشہ خفیہ نہیں رہ سکتا، تفصیلی وجوہات بعد میں دی جائیں گی۔ خیال رہے سپریم کورٹ نے جمعرات کو سینیٹ انتخابات اوپن بیلٹ سے کروانے سے متعلق صدارتی ریفرنس پر فریقین کے دلائل مکمل ہونے کے بعد رائے محفوظ کرلی تھی۔

چینی ہیکرز کے حملے،بھارتی ہسپتال ،سٹاک مارکیٹ،ٹرینیں کئی گھنٹے بند رہیں،مودی حکومت کو پیش رپورٹ میں انکشاف

 

ایک تحقیقاتی رپورٹ میں کہا گیا ہے کہ لداخ میں سرحد پر جس وقت بھارت اور چین کے درمیان سخت فوجی کشیدگی پیدا ہوگئی تھی اور دونوں ملکوں کی افواج ایک دوسرے کے آمنے سامنے آگئی تھیں اسی دوران چین نے بھارت میں بجلی سپلائی کرنے والی کئی اہم تنصیبات کو سائبر حملوں کا نشانہ بنایا تھا۔ ممبئی میں بجلی کی ترسیل میں زبردست رکاوٹ اس کی ایک واضح مثال ہے۔

بھارتی میڈیا نے، حکومت کو پیش کی گئی ایک رپورٹ کے حوالے سے بتایا کہ گزشتہ برس جون میں گلوان وادی میں چینی فوج کے ساتھ جھڑپ کے دوران بیس بھارتی جوانوں کی ہلاکت کے بعد جب دونوں ملکوں کے درمیان کشیدگی اپنے عر وج پر تھی، اسی دوران چین نے بجلی فراہم کرنے والی تنصیبات پر سائبر حملے کیے تھے۔

ممبئی میں تاریکی

اکتوبر سن2020 میں بھارت کے اقتصادی دارالحکومت ممبئی میں بجلی کی ترسیل میں بڑے پیمانے پر خرابیاں پیدا ہوگئی تھی، جس کی وجہ سے ٹرینوں کی آمدورفت رک گئی تھی، ہسپتال بند ہوگئے تھے اور اسٹاک ایکسچنج بھی کئی گھنٹے تک بند رہا تھا۔ رپورٹ میں مبینہ طورپر کہا گیا ہے کہ یہ چینی ہیکرز کی کارستانی ہو سکتی ہے۔ چین نقصاندہ سافٹ ویئر(Malware) بھارت میں بجلی سپلائی کے نظام میں داخل کرنے میں غالباً کامیاب ہوگیا تھا۔

رپورٹ کے مطابق غالباً چین سے تعلق رکھنے والا ایک گروپ RedEcho   ہیکنگ میں ملوث تھا ۔ ممبئی میں بجلی کی ترسیل میں ہونے والی خرابی کی جانچ سے اس سلسلے میں ”اضافی شواہد” ملے ہیں۔

حساس تنصیبات چینی سائبر حملوں کی زد پر

رپورٹ میں مزید کہا گیا ہے کہ چینی ہیکرز  ہیکنگ کے جدید ترین طریقہ کار کا استعمال کرتے ہوئے منظم حملے کرتے ہیں اور اس کی وجہ سے بھارت کی انتہائی حساس تنصیابت ان کی زد پر ہیں۔

سائبر ہیکنگ اور کمپیوٹر نظام میں نقصان دہ کوڈ کی موجودگی کا پتہ ایک امریکی کمپنی ریکارڈیڈ فیوچر نے لگایا ہے، جو اس طرح کے آن لائن ڈیجیٹل خطرات کا تجزیہ کرتی ہے۔ اس نے انکشاف کیا کہ بیشتر Malware ابھی بھی ایکٹی ویٹ نہیں ہوئے اور چونکہ ریکارڈیڈ فیوچر کو بھارت کے بجلی کے نظام تک رسائی نہیں ہے اس لیے وہ خود اس کوڈ کی تفصیلات کا جائزہ نہیں لے سکی جو ملک بھر میں ا نتہائی اہم بجلی کے نظام تقسیم میں داخل کردیے گئے ہیں۔

کم از کم دس کمپنیوں پر حملے

رپورٹ میں کہا گیا ہے کہ بھارت میں بجلی فراہم کرنے والی کم از کم دس اہم کمپنیوں کو نشانہ بنایا گیا تھا اور ان میں ملک بھر میں علاقائی سپلائی کے پانچ میں سے چار مراکز شامل ہیں۔ اس کے علاوہ دو بھارتی بندرگاہوں کو بھی نشانہ بنایا گیا تھا۔

ریکارڈیڈ فیوچر کا کہنا ہے بجلی کی فراہمی سے وابستہ تنظیموں کو نشانہ بنانے کے واضح  ثبوت پائے گئے ہیں۔ بھارت میں بجلی پیدا کرنے اور ٹرانسمیشن سیکٹر سے وابستہ انتہائی اہم سمجھے جانے والے بارہ اداروں کی مجموعی طور پر 21 آئی پی ایڈریسیز کو نشانہ بنایا گیا تھا۔


بھارت کے ایک سابق فوجی جنرل کا کہنا ہے کہ یہ سائبر حملے چین کی طرف سے وارننگ تھی

‘یہ وارننگ تھی‘

ممبئی میں گزشتہ اکتوبرمیں ہونے والے بلیک آؤٹ کے بعد بھارتی میڈیا نے چینی سائبر حملوں کا امکان ظاہر کیا تھا۔ تاہم بھارتی عہدیداروں نے اس پر مکمل خاموشی اختیار کر لی تھی۔

بھارت کے سابق فوجی افسر اور سن 2016 میں لائن آف کنٹرول کے پار سرجیکل اسٹرائیک کی ذمہ داری سنبھالنے والے ریٹائرڈ لفٹننٹ جنرل ڈی ایس ہوڈا کا کہنا ہے کہ یہ چینی سائبر حملے غالباً بیجنگ کی جانب سے بھارت کو ‘اشارہ‘ دینے کے لیے کیے گئے ہوں گے۔

جنرل ڈی ایس ہوڈا نے میڈیا سے بات چیت کرتے ہوئے کہا،”میں سمجھتا ہوں کہ یہ چین کی جانب سے ایک اشارہ تھا کہ ہم یہ کر سکتے ہیں اور بحران کے وقت ہمار ے اندر ایسا کچھ کرنے کی صلاحیت ہےں۔ یہ ایک طرح سے بھارت کو وارننگ دینے کے مترادف ہے‘‘

ووٹ ہمیشہ خفیہ نہیں رہ سکتا ،سینٹ الیکشن خفیہ ووٹنگ سے ہی ہوگا:سپریم کورٹ نے صدارتی ریفرنس پر رائے دے دی

اسلام آباد: سپریم کورٹ نے سینیٹ الیکشن سے متعلق صدارتی ریفرنس پر رائے دے دی۔

سپریم کورٹ نے اپنی رائے میں کہا ہے کہ سینیٹ الیکشن آئین کے تابع ہیں لہٰذا یہ الیکشن آئین کےمطابق ہوں گے۔

جیونیوز کے مطابق سپریم کورٹ نے یہ رائے ایک چار سے دی ہے جب کہ سپریم کورٹ کے جج جسٹس یحییٰ آفریدی اپنی رائے کا اظہار الگ سے تحریری طور پر کریں گے۔

عدالت نے اپنی رائے میں کہا ہےکہ سینیٹ الیکشن اوپن بیلٹ سے نہیں کروائے جاسکتے لہٰذا یہ انتخابات قانون کے بجائے آئین کے تحت ہوں گے۔

سپریم کورٹ نے اپنی رائے میں کہا ہےکہ الیکشن کمیشن شفاف الیکشن کے لیے تمام اقدامات کر سکتا ہے، انتخابی عمل سے کرپشن ختم کرنا الیکشن کمیشن کی ذمہ داری ہے، تمام ادارے الیکشن کمیشن کےساتھ تعاون کے پابند ہیں، الیکشن کمیشن کرپشن کے خاتمے کے لیے تمام ٹیکنالوجی کا بھی استعمال کر سکتا ہے۔

عدالتِ عظمیٰ نے کہا ہے کہ الیکشن کمیشن کے پاس اختیار ہے کہ وہ کرپٹ پریکٹس کے خلاف کارروائی کرے، تمام ایگزیکٹو  اتھارٹیز الیکشن کمیشن سے تعاون کی پابند ہیں، الیکشن کمیشن 218 تین کے تحت کرپشن روکنے کے تمام اقدامات کرے۔

چیف جسٹس پاکستان جسٹس گلزار احمد کا کہنا تھا کہ ابھی عدالت نے مختصر فیصلہ جاری کیا ہے اور تفصیلی وجوہات بعد میں جاری کی جائیں گی۔

معزز چیف جسٹس نے کہا کہ سپریم کورٹ اپنے فیصلے میں قرار دے چکی ہے کہ سیکریسی کبھی بھی مطلق نہیں ہوسکتی اور ووٹ ہمیشہ کے لیے خفیہ نہیں رہ سکتا، ووٹنگ میں کس حد تک سیکریسی ہونی چاہیے یہ تعین کرنا الیکشن کمیشن کا کام ہے۔

عدالتی رائے زبردست ہے: فیصل جاوید

عدالت کے باہر میڈیا سے گفتگو کرتے ہوئے پی ٹی آئی رہنما فیصل جاوید نے کہا کہ عدالت کا فیصلہ خوش آئند اور زبردست ہے، اٹارنی جنرل اور ان کی پوری ٹیم نے بہت محنت کی اور زبردست دلائل دیے گئے، لوگوں کو پہلی بار پتا چلا کہ سینیٹ کے الیکشن میں پہلے کیا ہوتا آیا ہے۔

انہوں نے کہا کہ سینیٹ الیکشن میں کروڑوں روپے خرچ کرکے کرپشن کی جاتی تھی، عمران خان کی ہر ممکن کوشش تھی کہ ہر سطح سے کرپشن کا خاتمہ کریں، سینیٹ الیکشن سے رشوت خوری کا خاتمہ کریں کیونکہ عمران خان نے پیسے لینے والوں کو فارغ بھی کیا۔

فیصل جاوید کا کہنا تھا کہ عدالت نے کہا ہے کہ سینیٹ الیکشن تاقیامت سیکرٹ نہیں رہ سکتے، اس حوالے سے الیکشن کمیشن کو ہدایت دی ہے، یہ شفافیت کے لیے زبردست رائے آئی ہے۔

واضح رہے کہ حکومت نے سینیٹ کا الیکشن اوپن بیلٹ سے کرانے کے لیے صدارتی ریفرنس دائر کیا تھا جب کہ ملک میں سینیٹ کے الیکشن 3 مارچ کو ہوں گے۔

فرانس کے سابق صدر کو کرپشن پر قید کی سزا

پیرس: فرانس کے سابق صدر نکولس سرکوزی کو بدعنوانی اور اثر و رسوخ کے غلط استعمال کے جرم میں ایک سال قید کی سزا سنائی گئی ہے۔

عالمی خبر رساں ادارے کے مطابق پیرس کی ایک عدالت نے 2007 سے 2012 تک ملک کے صدر رہنے والے نکولس سرکوزی کو ایک جج خریدنے اور 2007 میں اپنی صدارتی انتخاب میں لوریئل وارث لیلیان بیٹن کورٹ سے غیر قانونی ادائیگی قبول کرنے کے جرم میں ایک سال کے لیے جیل بھیج دیا۔

عدالت نے سابق صدر نکولس سرکوزی کو کسی بھی عہدے پر کام کرنے سے بھی روک دیا۔ نکولس فرانس میں جیک چیراک کے بعد دوسرے صدر ہیں جنہیں کرپشن پر سزا سنائی گئی ہے۔

عدالت نے اپنے فیصلے میں لکھا کہ خود ایک سابق وکیل کی حیثیت سے سرکوزی ایسی غیر قانونی کارروائی کا ارتکاب کرنے کے بارے میں مکمل طور پر آگاہ تھے اور ان کے دو ساتھی ملزمان کو بھی ایک ہی سزا سنائی گئی تھی۔

66 سالہ سیاستدان پر الزام تھا کہ 2014 میں ایک سینیئر مجسٹریٹ سے ملازمت کے بدلنے کسی قانونی کارروائی کے بارے میں غیر قانونی طور پر معلومات حاصل کرنے کی کوشش کی تھی۔

یہ بات اس وقت منظر عام پر آئی جب نکولس سرکوزی اور ان کے وکیل تھیری ہرزگ کے مابین کشیدگی ہوئی تھی

اسلام آباد یونائیٹڈ کے ایک کھلاڑی کا کورونا ٹیسٹ مثبت، میچ تاخیر کا شکار

پاکستان سپر لیگ (پی ایس ایل) 2021 میں اسلام آباد یونائیٹڈ اور کوئٹہ گلیڈی ایٹرز کے درمیان میچ سے قبل ہی یونائیٹڈ کے کھلاڑی فواد احمد کا کورونا ٹیسٹ مثبت آگیا، جس کے بعد میچ کو 9 بجے تک کے لیے مؤخر کردیا گیا۔

پاکستان کرکٹ بورڈ (پی سی بی) نے تصدیق کرتے ہوئے ٹوئٹر پر بیان میں کہا کہ ‘آج شام ہونے والے میچ میں شامل ٹیموں میں سے ایک ٹیم کے کھلاڑی کا ٹیسٹ مثبت آگیا ہے’۔

بیان میں کہا گیا کہ ‘کھلاڑی کو دو روز قبل علامات ظاہر ہوئی تھیں اور فوری طور پر آئسولیشن میں بھیج دیا گیا تھا’۔

پی سی بی نے کہا کہ ‘مذکورہ ٹیم کے دیگر کھلاڑیوں کے ٹیسٹ منفی آئے ہیں جبکہ دوسری ٹیم کے کھلاڑیوں کے بھی ٹیسٹ کیے جارہے ہیں’۔

پی سی بی نے ایک اور ٹوئٹ میں کہا کہ اسلام آباد یونائیٹڈ اور کوئٹہ گلیڈی ایٹرز کے درمیان میچ 9 بجے شروع ہوگا۔

اسلام آباد یونائیٹڈ نے ٹوئٹر پر تصدیق کرتے ہوئے لکھا کہ ‘ہمارا ایک کھلاڑی فواد احمد کا کووڈ ٹیسٹ مثبت آگیا ہے اور 2 روز قبل ہی انہیں فوری طور پر آئسولیشن بھیج دیا گیا تھا’۔

بیان میں کہا گیا کہ ‘اسلام آباد یونائیٹڈ کے دیگر تمام کھلاڑیوں اور اراکین کا ٹیسٹ منفی آگیا ہے اور کھلاڑیوں کو کھیل کے لیے کلیئر قرار دیا گیا ہے’۔

اسلام آباد یونائیٹڈ نے فواد احمد کی فوری صحت یابی کے لیے دعا کی اور کہا کہ کھلاڑی رات کو میچ کے لیے تیار ہیں۔

بیان میں کہا گیا کہ ‘اب میچ رات 9 بجے کے لیے شیڈول ہے، دیگر تمام ٹیموں کا اس وقت ٹیسٹ کیا جا رہا ہے، اسلام آباد یونائیٹڈ کو کھیل کے لیے کلیئر قرار دیا گیا ہے’۔

خیال رہے کہ اسلام آباد یونائیٹڈ اور کوئٹہ گلیڈی ایٹرز کے درمیان پی ایس ایل کا 12 واں میچ شام 7 بجے شیڈول تھا لیکن ٹیموں کو ہوٹل میں روک دیا گیا اور دیگر کھلاڑیوں کی کلیئرنس تک میچ کو مؤخر کردیا گیا۔

اسلام آباد یونائیٹڈ 3 میچوں میں 2 فتوحات اور ایک شکست کے ساتھ 4 پوائنٹس حاصل کر کے ٹورنامنٹ میں چوتھے نمبر پر ہے۔

آئی سی سی کا بوم بوم آفریدی کو سالگرہ پر خراج تحسین

انٹرنیشنل کرکٹ کونسل نے پاکستان کے سابق کپتان اور جارح مزاج بلے باز شاہد آفریدی کو ان کی سالگرہ کے موقع پر خراج تحسین پیش کیا ہے۔

آئی سی سی کی جانب سے سوشل میڈیا پر بوم بوم آفریدی کو ان کی 44  ویں سالگرہ پر مبارکباد دی گئی ہے۔

انٹرنیشنل کرکٹ کونسل کی جانب سے شاہد آفریدی کو سالگرہ کی مبارکباد دینے کے ساتھ لکھا گیا ہے کہ پہلے اپنے ڈیبیو میچ میں 37 گیندوں پر سنچری بنائی اور اب ایک روزہ میچز میں سب سے زیادہ چھکوں کا ریکارڈ بھی ان کے پاس ہے۔

شاہد آفریدی کی جانب سے بھی سوشل میڈیا پر اپنی سالگرہ پر مبارکباد پیش کرنے والوں کا شکریہ ادا کیا گیا ہے۔

خیال رہے کہ شاہد آفریدی نے اکتوبر 1996 میں کینیا کے خلاف اپنا ون ڈے ڈیبیو کیا اور انہوں نے پاکستان کی جانب سے آخری ایک روزہ میچ مارچ 2015 میں آسٹریلیا کے خلاف کھیلا تھا۔

شاہد آفریدی نے پاکستان کی جانب سے 398 ایک روزہ انٹرنیشنل میچز کھیلے جس میں انہوں نے 351 چھکے مارے اور 23 اعشاریہ 57 کی اوسط سے 8054 رنز اسکور کیے۔