جنوبی کوریا میں مارشل لا کی کوشش کے معاملے پر ملک کے آرمی چیف، پارک آن سو، نے استعفی دینے کی پیشکش کر دی۔
غیر ملکی خبر رساں ایجنسی کے مطابق، پارک آن سو، جو مارشل لا ایڈمنسٹریٹر بھی تھے، نے پارلیمنٹ میں اپنے بیان میں کہا کہ ان کا صدر کے مارشل لا نافذ کرنے کے فیصلے سے معمولی سا تعلق تھا۔ انہوں نے مزید کہا کہ “ہم فوجی امور میں ماہر ہیں، لیکن مارشل لا جیسے معاملات میں نہیں۔”
رپورٹس کے مطابق، صدر کو مارشل لا نافذ کرنے کی تجویز دینے والے وزیر دفاع کا استعفی بھی منظور کر لیا گیا ہے۔
واضح رہے کہ دو روز قبل جنوبی کوریا کے صدر نے ملک میں مارشل لا نافذ کیا تھا، تاہم پارلیمنٹ کی جانب سے اس کے خلاف ووٹ دیے جانے کے بعد صدر نے مارشل لا اٹھانے کا اعلان کر دیا۔
مارشل لا کے خاتمے کے بعد، پارلیمنٹ نے صدر کے خلاف مواخذے کی تحریک بھی جمع کرا دی ہے، جس سے ملک میں سیاسی حالات مزید کشیدہ ہو گئے ہیں۔
