کراچی: شہرپرمغربی سسٹم کے اثرات یخ بستہ ہواوں کی صورت نمودارہونا شروع ہوگئے، دن بھرمعمول سے تیزشمال مشرقی (بلوچستان) کی ہوائیں چلیں، رفتار38 کلومیٹرفی گھنٹہ ریکارڈ ہوئیں جبکہ بدھ کو پارہ گرنے کا امکان ہے۔
تفصیلات کے مطابق پیرکو کم سے کم پارہ 15.5ڈگری سینٹی گریڈ ریکارڈ ہوا، بلوچستان کے راستے گزشتہ دنوں ملک میں داخل ہونے والے مغربی سسٹم کے عقب میں موجود کولڈ ائیر سندھ/ بلوچستان پراثر انداز ہورہی ہیں جس کے نتیجے میں پیر کی صبح کوئٹہ کی یخ بستہ ہواوں نے شہرکا رخ کیا۔
واضح رہے کہ محکمہ موسمیات کی جانب سے چندروز قبل موسم سرد ہونے کی پیش گوئی کی گئی تھی، محکمہ موسمیات کے مطابق شہرمیں ہواوں کی زیادہ سے زیادہ رفتار 38کلومیٹرفی گھنٹہ ریکارڈ ہوئی، پیر کی صبح شہرکی فضاوں پردھند چھانے کے سبب حدنگاہ متاثرہوئی۔
محکمہ موسمیات کے مطابق حدنگاہ 2کلومیٹرریکارڈ ہوئی جبکہ کم سے کم پارہ 15.5ڈگری سینٹی گریڈ ریکارڈ ہوا، کل بھی شہرمیں معمول سے تیزہوائیں چلنے کا امکان ہے۔
چیف میٹرولوجسٹ کراچی سردارسرفراز کے مطابق مسلسل شمال مشرقی ہوائیں چلنے کے سبب بدھ کو درجہ حرارت میں مزید کمی متوقع ہے، تاہم انھوں نے پارہ سنگل ڈیجٹ میں جانے کا امکان رد کردیا۔
