نگراں خیبرپختونخوا کابینہ کی تشکیل مکمل کرلی گئی ہے اور ذرائع کا کہنا ہے کہ گزشتہ کابینہ کے بیشتر وزراء کو ایک بار پھر نئی کابینہ میں شامل کیا گیا ہے، اور ان کے قلمدانوں میں بھی ردوبدل نہیں کی گئی ہے۔
نگران وزیر اعلیٰ خیبر پختونخوا اعظم خان کے انتقال کے بعد گزشتہ روز جسٹس (ر) ارشد حسین نے بطور نگران وزیراعلی کے پی حلف اٹھایا تھا، اب ذرائع کا کہنا ہے کہ نگراں خیبرپختونخوا کابینہ کی تشکیل بھی مکمل کرلی گئی ہے۔
ذرائع کے مطابق نئی نگراں صوبائی کابینہ میں گزشتہ کابینہ کے بیشتر وزراء کو ایک بار پھر شامل کیا گیا ہے اور ان کے قلمدانوں میں بھی ردوبدل نہیں کی گئی ہے، تاہم صوبائی کابینہ میں نئے وزراء بھی لئے جانے کا امکان ہے۔
ذرائع نے بتایا کہ نئے وزراء کے ناموں پر مشاورت جاری ہے، گورنر کے پی نگراں وزراء سے ایک بار پھر ان کےعہدوں کا حلف لیں گے، اور حلف برداری کی تقریب آج سہ پہر 3 بجے ہوگی۔
خیال رہے کہ 11 نومبر کو خیبرپختونخوا کے نگراں وزیراعلیٰ اعظم خان 90 سال کی عمر میں انتقال گرگئے تھے، جس کے بعد ان کی کابینہ بھی خود کار طریقے سے تحلیل ہوگئی تھی۔