تازہ تر ین

وزیراعظم عمران خان کے ڈیجیٹل پاکستان پروگرام میں اپنی خدمات سرانجام دینے کیلئے گوگل کی سنیئر پاکستانی ایگزیکٹو تانیہ ایدرس اہم عہدہ چھوڑ کر پاکستان آ گئیں

اسلام آباد(ویب ڈیسک)گوگل کی ایک سینیئر پاکستانی ایگزیکٹو تانیہ ایدرس اہم عہدہ چھوڑ کر پاکستان آگئی ہیں اور یہاں وہ وزیراعظم عمران خان کے ڈیجیٹل پاکستان وڑن پروگرام میں اپنی خدمات سرانجام دیں گی۔تانیہ ایدرس سنگاپور میں واقعہ گوگل کے علاقائی ہیڈ آفس میں اہم پوزیشن پر فائز تھیں لیکن وہ اپنی پرکشش نوکری چھوڑ کر پاکستان میں وزیراعظم عمران خان کے ڈیجیٹل وڑن پروگرام کی سربراہی کریں گی۔تانیہ نے امریکا کی میساچیوسٹس انسٹی ٹیوٹ آف ٹیکنالوجی سے ایم بی اے کی ڈگری حاصل کی ہے۔ڈیجیٹل پاکستان پروگرام کی افتتاحی تقریب سے خطاب میں تانیہ ایدرس کا کہنا تھا کہ میرا صرف ایک ایجنڈہ ہے اور وہ یہ ہے کہ میں پاکستان کو ترقی کرتا دیکھنا چاہتی ہوں۔
‘حکومت کو عام پاکستانی کے مستقبل کی پرواہ ہے’
تانیہ کا کہنا تھا کہ جب یہ حکومت آئی تو مجھے محسوس ہوا کہ میں پاکستان جاکر کچھ کرسکتی ہوں کیونکہ مجھے اعتماد تھا کہ اس حکومت کو عام پاکستانی کے مستقبل کی پرواہ ہے۔انہوں نے بتایا کہ جہانگیر ترین نے مجھے پاکستان آنے پر رضامند کیا اور وزیراعظم اور انفارمیشن ٹیکنالوجی کے وزیر سے ملاقات کروائی جس سے مجھے واپس پاکستان آنے کا حوصلہ ہوا۔ٹوئٹر پر اپنے بیان میں تانیہ ایدرس نے کہا ہے کہ ’میں وزیراعظم عمران خان اورجہانگیر ترین کا شکریہ اداکرتی ہوں کہ جنہوں نے مجھے موقع دیا تاکہ میں اپنے ملک کو کچھ لوٹا سکوں‘۔تانیہ ایدرس کا کہناہے کہ سب کی حمایت سے ہم انشاءاللہ ڈیجیٹل پاکستان وڑن کو حقیقت میں تبدیل کردیں گے۔آخر میں ان کا کہنا تھا کہ جیسا کے وزیراعظم کہتے ہیں کہ ‘ گھبرانا نہیں ہے’۔اسلام آباد میں وزیراعظم عمران خان نے ڈیجیٹل پاکستان وڑن پروگرام کی افتتاحی تقریب سے خطاب کرتے ہوئے کہا کہ کرپشن کے خاتمے کےلیے ای گورننس ضروری ہے، اداروں میں جیسے ہی ای گورننس آئی، ادارےتبدیل ہوگئے۔عمران خان کا کہنا تھا کہ بے روزگاری کے جن پر قابو پانے کے لیے ٹیکنالوجی کا فروغ ناگزیر ہے،ڈیجیٹل پاکستان پروجیکٹ نوجوانوں کےلیےمفید ہے،اس کابھرپورفائدہ اٹھائیں گے۔وزیراعظم نے تانیہ ایدرس کے پاکستان آنے کے فیصلے کو سراہتے ہوئے کہا کہ جولوگ زندگی میں اوپرپہنچے انہوں نے بڑے فیصلے کیے ہیں ، چھوٹا فیصلہ ذاتی ہوتا ہے، جب کہ بڑا فیصلہ دوسروں کے لیے ہوتا ہے۔تقریب کے بعد میڈیا سے گفتگو کرتے ہوئے معاون خصوصی اطلاعات فردوس عاشق اعوان نے بتایا کہ ڈیجیٹل پاکستان میں 5 پیرامیٹرزکا تعین کیا گیا ہے، اس سے انفارمیشن ٹیکنالوجی کے شعبے کی استعداد میں اضافہ ہوگا۔فردوس عاشق اعوان نے مزید بتایا کہ ای گورننس سے شفافیت کو فروغ ملےگا، ڈیجیٹیلائزیشن سے ہر شعبے میں جدت لانے میں مدد ملےگی اور اس کے ذریعے عام آدمی کی معلومات تک رسائی ہوگی۔



خاص خبریں



سائنس اور ٹیکنالوجی



تازہ ترین ویڈیوز



HEAD OFFICE
Khabrain Tower
12 Lawrance Road Lahore
Pakistan

Channel Five Pakistan© 2015.
© 2015, CHANNEL FIVE PAKISTAN | All rights of the publication are reserved by channelfivepakistan.tv