عدیس ابابا(ویب ڈیسک) افریقی ملک ایتھوپیا میں حکومت کے خلاف بغاوت کی کوشش کو ناکام بنادیا گیا جب کہ باغیوں کے حملے میں فوج کے چیف آف اسٹاف جنرل سیارے مکینن ہلاک ہوگئے۔ ایتھوپیا کے سرکاری میڈیا کے مطابق ریاست امہارا میں باغیوں نے حکومت کا تختہ اُلٹنے کے لیے حملہ کیا اس دوران آرمی چیف آف اسٹاف جنرل سیارے مکینن مزاحمت کرتے ہوئے باغیوں کی فائرنگ سے ہلاک ہوگئے۔رپوٹ کے مطابق امہارا ایتھوپیا کی نو ریاستوں میں سے ایک ہے جہاں امہارا کے سربراہ اور مشیر کو بھی دفتر میں قتل کردیا گیا ہے۔ایتھوپیا میں انٹرنیٹ سروس بھی معطل ہے اور سیکیورٹی بھی سخت کردی گئی۔ ادھر امریکی سفارتخانے نے ایتھوپیا کی صورت حال پر سیکیورٹی الرٹ جاری کردیا ہے۔امریکی سفاتخانے کے مطابق دارالحکومت ادیس ابابا میں فائرنگ کی اطلاعات ہیں جب کہ دارالحکومت سے باہر دیگر علاقوں میں تشدد کے واقعات بھی پیش آئے ہیں۔واضح رہے کہ حالیہ چند سالوں میں ایتھوپیا کی ریاست المہارا سمیت کئی علاقوں میں قومیت کی بنیاد پر جھڑپوں میں اضافہ ہوگیا ہے۔
