لاہور (ویب ڈیسک ) بوب ویٹین اور الفریڈ اسمتھ برطانیہ کے معمر ترین شہری ہیں جو ایک ہی دن 111 سال کے ہوگئے۔حیران کن بات یہ ہے کہ دونوں جڑواں بھائی نہیں یا ان کا آپس میں کوئی تعلق نہیں مگر دونوں میں ایک چیز مشترک ہے اور وہ ہے ان کی تاریخ پیدائش 29 مارچ 1908۔
اور جب کسی کی عمر اتنی زیادہ ہو تو اس سے ایک سوال ضرور پوچھا جاتا ہے کہ طویل العمری کا راز کیا ہے۔
اور جب ان دونوں سے یہ پوچھا گیا تو ان کا جواب کسی مخصوص سپرفوڈ یا جسمانی سرگرمی نہیں تھا، درحقیت دونوں کو ہی کوئی اندازہ نہیں کہ ان کی عمر اتنی زیادہ کیسے ہوگئی۔
بوب ویٹین سے جب یہ سوال پوچھا گیا تو ان کا جواب تھا کہ وہ تو اس لیے 111 سال کے ہوگئے کیونکہ وہ ‘خود کو مرنے سے بچاتے’ رہے۔
اس کے مقابلے میں الفریڈ اسمتھ نے یہ کریڈٹ جو کے دلیے کو دیا۔
ان کا کہنا تھا کہ کہ دلیہ بہت مددگار ثابت ہوا اور اسے کھا کر آپ خود بھی لطف اندوز ہوتے ہیں۔
تاہم الفریڈ اسمتھ کا یہ بھی کہنا تھا کہ دیگر افراد کی طرح وہ خود بھی حیران ہیں کہ آخر ان کی زندگی اتنی لمبی کیسے ہوگئی۔
انہوں نے کہا ‘میرے خیال میں میں نے اچھی زندگی گزاری، میں خود سے پوچھتا ہوں کہ آخر مجھے اتنی لمبی عمر کیوں ملی؟ آخر میں نے اتنی لمبی زندگی کیسے پائی جو دوسروں کو نہیں ملتی؟’
الفریڈ اسمتھ کا تعلق اسکاٹ لینڈ جبکہ بوب ویٹین برطانیہ سے تعلق رکھتے ہیں اور دونوں کی کبھی ملاقات تو نہیں ہوئی مگر اب ایک دوسرے کو جڑواں بھائی تصور کرتے ہیں۔
دونوں کئی برسوں سے ایک دوسرے کو برتھ ڈے کارڈ بھی بھیج رہے ہیں مگر بوب ویٹین برطانوی ملکہ کے کارڈز لینے سے گریز کرتے ہیں۔
یہ ایک برطانوی روایت ہے کہ جب کوئی شخص 100 سال کا ہوجاتا ہے تو اسے ہر سال سالگرہ پر ملکہ کی جانب سے برتھ کارڈ بھیجا جاتا ہے۔
ویسے یہ دونوں برطانیہ کے معمر ترین افراد ضرور ہیں مگر دنیا کے نہیں، یہ اعزاز اس وقت 112 سالہ گریس جونز کے پاس ہے جو اس وقت دنیا کی معمر ترین شخصیت ہیں۔
