تازہ تر ین

پاکستان نیوز میڈیا ایسوسی ایشن کے نام سے ہمہ گیر، وسیع البنیاد تنطیم کا اعلان ،ایڈیٹرز، اینکرز، ڈیجیٹل میڈیا، کالم نگار، ایڈورٹائزر ز ، دانشور شامل ہو نگے: چیئرمین کمیٹی ضیا شاہد،لاہور سے امتنان شاہد، ارشاد احمد عارف، اعجاز الحق، رحمت علی رازی، ایاز خان، رانا عظیم،جبار خٹک اجلاس میں شریک تھے،اسلام آباد سے حامدمیر، شاہد مسعود، جاوید چودھری کا پیغام شمولیت، کراچی سے سینئر صحافیوں، دانشوروں،ایڈیٹرز کے وفد کی اجلاس میں شرکت

لاہور (وقائع نگار) پاکستان بھر کے مختلف شہروں سے تعلق رکھنے والے اخبارات، ٹی وی، ریڈیو اور ڈیجیٹل میڈیا سے منسلک ممتاز افراد کی ایک بڑی تعداد نے لاہور کے اواری ہوٹل میں منعقدہ اپنے ایک اجلاس میں پاکستان نیوز میڈیا ایسوسی ایشن (PNMA) کے نام سے ایک ہمہ گیر اور وسیع البنیاد تنظیم کے قیام کا فیصلہ کیا ہے۔ یہ اجلاس کونسل آف پاکستان نیوزپیپر ایڈیٹرز (سی پی این ای) کے زیر اہتمام جنوری 2019ءمیں منعقدہ اسلام آباد میں ”پاکستان میڈیا کنونشن“ میں کئے گئے فیصلے کے تسلسل میں منعقد کیا گیا۔ ”پاکستان نیوز میڈیا ایسوسی ایشن“ (PNMA) کے قیام کا فیصلہ کرتے ہوئے ایک اعلامیہ بھی منظور کیا گیا، جس میں کہا گیا ہے کہ سائنس و ٹیکنالوجی کی ترقی پر مبنی آج کے جدید اور ترقی یافتہ دور میں میڈیا کا عمل دخل ملک کے سماجی، معاشی، سیاسی شعبوں اور انسانی وخاندانی زندگیوں میں انتہائی اہمیت اختیار کر گیا ہے۔ آزاد، مستحکم اور متحرک میڈیا بنیادی انسانی حقوق کا جزوِ لاینفک اور ہماری سوسائٹی اور ہماری معیشت کا ایک بنیادی حصہ بھی بن چکا ہے۔ سماجی، معاشی، سیاسی شعبوں اور انسانی وخاندانی اقدار اور معیار زندگی کے ارتقاءکے لئے آزاد، مستحکم اور متحرک میڈیا ضروری ہے جس کے لئے میڈیا میں جدید ترین ہنر سے آراستہ افرادی قوت اور معاشی استحکام درکار ہوگا جو پاکستان میں آزاد، متحرک اور مستحکم میڈیا کے فروغ اور تقویت کے لئے لازمی عوامل ہیں۔ ان عوامل میں پاکستان میں میڈیا کی تمام کیٹیگریز اور تمام اقسام کے تمام شعبوں میں مصروف عمل افراد میں باہمی روابط، نیٹ ورکنگ کا قیام اور فروغ شامل ہیں۔ اعلامیہ میں کہا گیا کہ جدید ٹیکنالوجی ، نئے رجحانات اور پروڈکشن میں جدیدیت سمیت تمام میڈیا امور کے لئے ایک مربوط، ہمہ گیر اور وسیع البنیاد پلیٹ فارم کی شدید ضرورت محسوس کی جا رہی تھی کیونکہ ہر شعبے کی الگ الگ تنظیمیں کام کررہی ہیں لیکن پاکستانی میڈیا کی مو¿ثر نمائندگی کے لئے کوئی فورم موجود نہیں۔ اعلامیے میں تنظیم کا بنیادی اصول مرتب کرتے ہوئے کہا گیا کہ ”پاکستان نیوز میڈیا ایسوسی ایشن“ (PNMA) میں میڈیا کے تمام شعبوں سے تعلق رکھنے والے سب افراد کو یکساں مقام ، حیثیت اور مرتبہ حاصل ہوگا۔ اجلاس میں 35 اراکین پر مشتمل آرگنائزنگ کمیٹی کی تشکیل دی گئی اور جناب ضیا شاہد کو آرگنائزنگ کمیٹی کا چیئرمین مقرر کیا گیا۔ آرگنائزنگ کمیٹی تین ماہ کے اندر رکنیت سازی کی تکمیل اور آئین تیار کرے گی جس کے بعد ”پاکستان نیوز میڈیا ایسوسی ایشن“ (PNMA) کے باقاعدہ انتخابات بھی عمل میں آئیں گے۔ اعلامےے میں سیکریٹریٹ کے امور کی انجام دہی کے لئے تنظیم کے انتخابات تک کونسل آف پاکستان نیوزپیپر ایڈیٹرز (سی پی این ای) سے معاونت کی درخواست کی گئی جس کی سی پی این ای کے عہدیداران نے آمادگی ظاہر کی۔ اجلاس میں جناب ضیا شاہد، مبشر زیدی، فیصل عزیز، رحمت علی رازی، ذوالفقار علی شاہ، ارشاد احمد عارف، ایاز خان، احمد اقبال بلوچ، خالد کھوکھر، امتیاز خان فاران، لالہ رحمان، ڈاکٹر جبار خٹک، عامر محمود، حامد حسین عابدی، کاظم خان، اعجازالحق، عالیہ شاہ، عدنان ملک، یوسف نظامی، سہیل اقبال، خضر حیات وٹو، آغا وقار، وقاص طارق، امتیاز روحانی اور بشیر احمد خان سمیت کثیر تعداد میں صحافیوں اور ٹی وی اینکرز نے شرکت کی۔اس موقع پر فیصل عزیز‘ معروف اینکر انیق احمد‘ امتیاز فاران صدر کراچی پریس کلب‘ عدنان ملک‘ میاں حبیب‘ دوست حفیظ‘ ارشد ربانی‘ خالد کھوکھر‘ سہیل خان‘ ریاض صحافی‘ عثمان وٹو‘ سٹار ایشیاءٹی وی کے غازی بابر اور PFUJ کے صدر رانا عظیم نے بھی اظہار خیال کیا۔ اس کے علاوہ رائل ٹی وی کے خضر وٹو نے بھی مختصر خطاب کیا۔ آرگنائزنگ کمیٹی کے چیئرمین ضیا شاہد نے کہا کہ لاہور اور کراچی کے ایڈیٹروں‘ ٹی وی اینکرز‘ کالم نویسوں کے ساتھ بعض ٹی وی چینلز کے مالکان اور منتظمین نے بھی شرکت کی خواہش ظاہر کی ہے۔ پاکستان کے صف اول کے اخباری ایڈیٹروں نے تنظیم میں شمولیت پر خوشی کا اظہار کیا ہے اور اعجاز الحق‘ جبار خٹک‘ ارشاد احمد عارف‘ کاظم خان‘ امتنان شاہد‘ رحمت علی رازی‘ علی احمد ڈھلوں نے تنظیم میں شمولیت کی خواہش کا اظہار کیا ہے اور اسلام آباد سے معروف ٹی وی اینکرز ڈاکٹر شاہد مسعود‘ حامد میر‘ جاوید چوہدری اور سردار خان نیازی نے تنظیم میں شمولیت کے پیغامات بھیجے۔ قبل ازیں سی پی این ای کے صدر عارف نظامی نے پاکستان نیوز میڈیا ایسوسی ایشن میں شمولیت کا اعلان کرتے ہوئے ایڈیٹروں‘ ٹی وی اینکرز‘ ٹی وی چینلز کے مالکان اور منتظمین کے علاوہ صف اول کے کالم نویسوں اور رائٹرز کو PNMA میں شمولیت کی دعوت دی اور کہا کہ پہلے سے موجود صحافی تنظیموں کا احترام کرتے ہیں اور ایک وسیع البنیاد تنظیم کے پیام کو پاکستانی میڈیا کےلئے خوش آئند قرار دیتے ہیں۔ اسی طرح کے خیالات کا اظہار سی پی این ای کے سیکرٹری جنرل جبار خٹک نے بھی کیا اور کہا کہ PNMA میں پہلی بار وفاقی سطح اسلام آباد اور صوبائی سطح لاہور‘ کراچی‘ کوئٹہ‘ پشاور کے بڑے پریس کلبوں کے سربراہوں کو خاص طور پر تنظیم میں شامل کیا گیا ہے تاکہ بڑے پریس کلبوں کو تنظیم میں مو¿ثر جگہ دی جاسکے۔ بعض ایسی شخصیات نے بھی تنظیم کو عملی تعاون کا یقین دلایا ہے جن کا تعلق ایڈورٹائزنگ کے شعبے سے ہے۔ تین ماہ میں تنظیم سازی کی تکمیل کے بعد اس وسیع البنیاد تنظیم کے الیکشن کروائے جائیں گے اور ہر شعبے سے کل پاکستان بنیادوں پر سینئر نائب صدور کے چناﺅ کا کام مکمل ہوگا۔ اس طرح یہ پاکستان میڈیا کی پہلی تنظیم ہوگی جو بیک وقت ایڈیٹرز‘ ٹی وی اینکرز‘ ڈیجیٹل میڈیا‘ کالم نگاروں‘ آرٹیکل رائٹرز‘ ایڈورٹائزنگ اور دانشوروں پر مبنی ہوگی اور ایک مو¿ثر میڈیا کی ترقی ، خوشحالی اور سربلندی کے لئے کام کریگی۔



خاص خبریں


imran khan

سائنس اور ٹیکنالوجی



تازہ ترین ویڈیوز



HEAD OFFICE
Khabrain Tower
12 Lawrance Road Lahore
Pakistan

Channel Five Pakistan© 2015.
© 2015, CHANNEL FIVE PAKISTAN | All rights of the publication are reserved by channelfivepakistan.tv