مطالبات تسلیم کرو ورنہ ن لیگ چھوڑ دوں گا:سکندر بوسن کی قیادت کودھمکی

ملتان (سپیشل رپورٹر) وفاقی وزیر حاجی سکندر حیات بوسن نے وفاقی وزیر توانائی سردار اویس خان لغاری کو حتمی الٹی میٹم دے دیا ہے کہ اگر انہوں نے اگلے 48گھنٹے میں میپکو ملتان کے لائن سپرنٹنڈنٹ نوید وینس کے خلاف چارج شیٹ ختم نہ کرائی اور ایس ای میپکو عمر لودھی کو فوری ٹرانسفر نہ کیا تو وہ مسلم لیگ (ن) سے علیحدگی اختیار کرکے اپنے بھائی اور تمام یونین چیئرمینوں سمیت جنوبی پنجاب متحدہ محاذ میں شمولیت کا اعلان کردیں گے کہ اگر ایک وفاقی وزیر کی اس کی حکومت میں ذاتی معاملات پر بھی غور نہیں کیا جاتا تو وہ حلقے کے عوام کو کیا منہ دکھائیں گے۔ نوید وینس کے ساتھ میرے حلقے کے ہزاروں ووٹ ہیں جنہیں میں کسی طور پر بھی نظرانداز نہیں کرسکتا۔ ووٹروں کو جواب دینے سے بہتر ہے کہ میں پارٹی ہی کو جواب دے دوں۔ اس پر اویس لغاری نے چیف ایگزیکٹو میپکو کو دوٹوک پیغام دیا کہ کسی بھی صورت میں سکندر حیات بوسن کو منایا جائے۔ ذرائع کے مطابق حاجی سکندر حیات بوسن پہلے ہی جنوبی پنجاب متحدہ محاذ میں شمولیت کے لئے گرین سگنل دے چکے ہیں اور انہوں نے ا راکین اسمبلی کی دوسری لاٹ میں اس محاذ کا حصہ بننا ہے۔ توجہ طلب امر یہ ہے کہ اس بات کا علم حکمران جماعت کو بھی ہے اس لئے حکومت بھی التوائی حربے استعمال کررہی ہے۔
سکندر بوسن