کراچی (مانیٹرنگ ڈیسک) ملک بھر میں سیاسی بسنت عروج پر پہنچ چکی ہے، نئے نئے اتحاد وجود میں آرہے ہیں جبکہ متحدہ پاکستان کی پتنگیں کٹنے کا سلسلہ بھی تیزی سے جاری ہے، ایم کیو ایم پاکستان کے ممبر قومی اسمبلی سلمان مجاہد بلوچ بھی پاک سرزمین پارٹی میں شامل ہوگئے ہیں۔تفصیلات کے مطابق ایم کیو ایم پاکستان کے اہم عہدیدار سلمان مجاہد بلوچ نے متحدہ پاکستان سے تمام رابطے ختم کرتے ہوئے مصطفی کمال کے قافلے میں شمولیت اختیار کر لی ہے، وہ پی ایس پی میں شمولیت کا اعلان پریس کانفرنس میں کریں گے۔ ایم این اے پی ایس پی کی قیادت سے ملاقات کے لئے پاکستان ہاس پہنچ گئے ہیں ۔اس سے قبل ایم کیو ایم پاکستان نے پارٹی قیادت سے اختلافات کی وجہ سے سلمان مجاہد بلوچ کی رکنیت ختم کردی تھی۔ سلمان مجاہد بلوچ کیماڑی کے حلقے سے ایم این اے منتخب ہوئے تھے۔
