لاہور (وقائع نگار) پاکستان پیپلز پارٹی کے سینئر رہنما چودھری اعتزاز احسن نے کہا ہے کہ مریم نواز نے فرنٹ فٹ پر سیاست کھیلی جس کے باعث (ن) لیگ میں اختلافات بڑھے، اس وقت بھی حکومت کے فیصلے نواز شریف کر رہے ہیں لہٰذا شہبازشریف ہو یا کوئی اور، ہدایات لینے لندن ہی جائے گا،نواز شریف کا نام ای سی ایل میں نہ ڈالنا دہرا معیار ہے، ملک میں یکساں احتساب کا نظام لایا جائے۔ سپریم کورٹ بار کے سالانہ انتخابات میں ووٹ کاسٹ کرنے کے بعد میڈیا سے گفتگو کرتے ہوئے اعتزاز احسن نے کہا کہ چیئرمین نیب کے لیے کڑا امتحان ہے کہ وہ غیرجانبداری کے ساتھ اپنے منصب سے عہدہ برآہ ہوتے ہیں کہ نہیں۔ چیئرمین نیب نے ڈاکٹر عاصم کا ریفرنس منگوایا ہے، اب دیکھنا ہو گا کہ ڈاکٹر عاصم کو رینجرز نے اپنے پاس کیوں رکھا، ڈاکٹر عاصم کو ضمانت ملنے کے بعد باوجود ان کا نام ای سی ایل میں ڈالا گیا جبکہ نواز شریف کا نام ای سی ایل میں شامل نہیں کیا گیا جو کہ دوہرا معیار ہے، جب بھی نواز شریف آئیں ان کا نام ای سی ایل میں ڈالا جائے۔ ایک سوال کے جواب میں انہوں نے کہا کہ اس وقت بھی حکومت کے فیصلے نواز شریف کررہے ہیں، اس لیے شہبازشریف ہو یا کوئی اور، ہدایات لینے برطانیہ ہی جائے گا۔ اعتزاز احسن نے کہا کہ مریم نواز کے فرنٹ فٹ پر سیاست کرنے سے مسلم لیگ (ن) میں اختلافات بڑھے کیونکہ مسلم لیگ (ن) کی سیاست کو جس کونے میں شہباز اور نثار ڈال رہے تھے مریم نواز نے اس سے نکالا۔ انہوں نے کہا کہ الیکشن اپنے وقت پر ہوں گے جس میں کسی کی جانب سے کوئی مداخلت نہیں ہو گی۔ ضمنی انتخابات میں کامیابی کا مطلب نہیں کہ 20کروڑ لوگ ساتھ ہیں لہٰذا انتخابات میں سخت مقابلہ ہو گا۔ انہوں نے کہا کہ پارٹیوں میں مائنس ون فارمولے نہیں ہونے چاہئیں، مائنس ون فارمولے پرعمل نہ کرنے کا فیصلہ (ن) لیگ کے حق میں بہترہے۔ انہوں نے کہا کہ نواز شریف اور اسحاق ڈار شہزادے ہیں جن کو گرفتار کرنے کے بجائے پروٹو کول دیا جا رہا ہے۔ ایک سوال کے جواب پیپلز پارٹی کے سنیٹر نے کہا کہ ٹیکنوکریٹ کی حکومت کی باتیں قبل از وقت ہیں۔ سنیٹر اعتزاز احسن نے زور دیا کہ ایبٹ آباد اور سانحہ ماڈل ٹاﺅن کی رپورٹ بھی منظر عام پر آنی چاہئیں۔

اسلام آباد (آئی این پی،مانیٹرنگ ڈیسک) سیکرٹری الیکشن کمیشن بابر یعقوب فتح محمد نے کہا ہے کہ نئی حلقہ بندیاں اور ووٹر لسٹوں کی نظرثانی مردم شماری کے نتائج شائع ہونے تک نہیں ہو سکتی،اگر ہمیں کم وقت دیا جائے گا تو غلطیوں کی گنجائش زیادہ ہو گی،پریزائیڈنگ افسران کی ٹریننگ مارچ یا اپریل میں شروع کی جائے گی، الیکشن کمیشن ایک آئینی ادارہ ہے، ہم عدلیہ کا احترام کرتے ہیں، الیکشن کمیشن اعلیٰ عدلیہ کی مداخلت کو خندہ پیشانی سے قبول کرتا ہے، ہم اس کو اپنے کام میں مداخلت نہیں سمجھتے،الیکشن کمیشن کے ذمے بہت کام ہے اور ہم نے یہ کام کچھ مہینوں میں کرنے ہیںہمارے پاس دن کم رہ گئے ہیں جبکہ ابھی ووٹر لسٹوں کی نظرثانی بھی ہونی ہے، پانچ مئی کے بعد ہم ووٹر لسٹوں کو نہیں چھیڑ سکتے، ہم کہتے ہیں کہ جو قانون میں ترامیم کرنی ہے کرلیںتا کہ ہم الیکشن میں جا سکیں،ہمارے ملک میں کبھی الیکٹرانک ووٹنگ مشینوں کا استعمال نہیں ہوا،کیا ہم ساڑھے تین یا چارلاکھ مشینیں صوبائی حکومتوں کے حوالے کر دیں؟اگر یہ مشینیں دس فیصدبھی ناکام ہوئیں تو پاکستان کا الیکشن رک جائے گا، ہمارے الیکشن کا موازنہ دوسرے ممالک سے نہ کیا جائے،بائیو میٹرک، الیکٹرانک ووٹنگ مشینوںاور اوورسیز ووٹنگ کے حوالے سے الیکشن کمیشن تجرباتی بنیادوں پر کام کرتا رہے اور اس کی رپورٹ پارلیمنٹ کو دی جائے اور پھر پارلیمنٹ اس بارے میں فیصلہ کرے۔منگل کو میڈیا ورکشاپ سے خطاب کرتے ہوئے سیکرٹری الیکشن کمیشن بابر یعقوب فتح محمد نے کہا کہ انتخابی فہرستوں کا مسئلہ اہم ہے،الیکشن کمیشن کی خود مختاری میں خاطر خواہ اضافہ ہوا ہے، جس پر ہم پارلیمنٹ کے مشکور ہیں کہ انہوں نے ہمارا نقطہ نظرسنا،چیف الیکشن کمشنر کو انتظامی اختیارات میسر ہیں۔ انہوں نے کہا کہ مالی معاملات میں بھی الیکشن کمیشن کو خود مختاری دی گئی ہے،پہلے یہ تجویز دی گئی تھی کہ الیکشن کمیشن قواعد بنائے گا جس کی منظوری وزیراعظم دیں گے،دوسری تجویز یہ دی گئی تھی کہ الیکشن کمیشن قوانین بنائے گااور اس کی منظوری صدر مملکت ممنون حسین دیں گے، تاہم پھر یہ فیصلہ ہوا کہ الیکشن کمیشن اپنے قواعد خود بنائے گااور پھر وہ انہیں اپنی ویب سائٹ پر پبلش کر دے گا جبکہ ان قواعد پر اعتراضات عوام سے لئے جائیں گے۔ انہوں نے کہا کہ الیکشن کے انعقاد کے دوران جو افراد بھی ڈیوٹی دے رہے ہوں گے وہ الیکشن کمیشن کے ماتحت ہوں گے،الیکشن کمیشن ان کے خلاف کارروائی بھی کر سکے گا اور سزا بھی دے سکے گا،ہمیں کہا گیاہے کہ 30چیزوں کے نوٹیفکیشن ویب سائٹ پر پبلش کئے جائیں،ہم نے اپنی سالانہ کارکردگی کی رپورٹ پارلیمنٹ کو بھیجنی ہے۔ الیکشن کمیشن نے کہا ہے کہ عام انتخابات 2018میں 10کروڑووٹرز کےلئے 20کروڑبیلٹ پیپرزچھاپے جائیں گے،انتخابات کےلئے تقریباً90ہزار پولنگ اسٹیشنز قائم کئے جائیں گے جن میں 2لاکھ70ہزار پولنگ بوتھ ہوں گے اور8لاکھ انتخابی عملہ ہو گا، اسمبلیوں کی مدت ختم ہونے کے 60روز میں انتخابات ہونا ضروری ہیں، حساس پولنگ اسٹیشنوں پر نگرانی کےلئے خفیہ کیمرے نصب کئے جائیں گے ،نئے قانون کے تحت انتخابی عملے سے ڈیوٹی شروع ہونے سے قبل حلف لینا لازمی قرار دیا گیا ہے،حلقے کا کوئی بھی ووٹر امیدوار پر اعتراضات کر سکتا ہے، سینیٹ کے امیدوار کےلئے اخراجات کی حد15لاکھ ،قومی اسمبلی کےلئے40لاکھ جبکہ صوبائی اسمبلیوں کے امیدوار وںکےلئے 20لاکھ روپے حد مقرر کی گئی ہے،جو شخص نیا شناختی کارڈ بنائے گا اس سے پوچھا جائے گا کہ وہ اپنے مستقل پتے پر ووٹ کا اندراج کرائے گایا عارضی پتے پر، ملک میں پچاس لاکھ لوگ ایسے ہیں جن کے پاس شناختی کارڈ تو ہے لیکن ان کے ووٹ کا اندراج نہیں ہوا۔منگل کومیڈیا ورکشاپ سے الیکشن کمیشن کے ایڈیشنل سیکرٹری اختر نذیر،ایڈیشنل سیکرٹری ظفر اقبال ، ڈی جی الیکشن کمیشن یوسف خٹک ، ڈائریکٹر ایم آئی ایس بابر ملک نے خطاب کیا۔ میڈیا ورکشاپ سے خطاب کرتے ہوئے الیکشن کمیشن کے ڈائریکٹر ایم آئی ایس بابر ملک نے کہا کہ انتخابی فہرستوں کو مرتب کرنا الیکشن کمیشن کے اہم فرائض میں شامل ہے، الیکشن ایکٹ 2017میں کچھ نئی چیزیں شامل کی گئی ہیں جو بھی شخص نیا شناختی کارڈ بنائے گا اس سے پوچھا جائے گا کہ وہ اپنے مستقل پتے پر ووٹ کا اندراج کرانا چاہتا ہے یا عارضی پتے پر، الیکشن کمیشن غیر مسلموں، معذور افراد اور خواجہ سراﺅں کو بھی انتخابی فہرستوں میں شامل کرنے کے حوالے سے اقدامات کرے گا، جو قواعد شناختی کارڈ پر ہوں گے وہی ووٹر لسٹ پر بھی ہوں گے۔ انہوں نے کہا کہ ملک میں پچاس لاکھ لوگ ایسے ہیں جن کے پاس شناختی کارڈ تو ہے لیکن ان کے ووٹ کا اندراج نہیں ہوا۔

اسلام آباد (خصوصی رپورٹ) تحریک لبیک یا رسول اللہﷺکے مرکزی سربراہ ڈاکٹر محمد اشرف آصف جلالی نے کہا ہے کہ ہم لولے لنگڑے مذاکرات کو مسترد کرتے ہیں ،ہماری مذاکراتی کمیٹی وزیر داخلہ احسن اقبال سے نیچے کسی سے ملاقات نہیں کرے گی۔
پارلیمنٹ کے سامنے ختم نبوت دھرنے کے شرکا اور صحافیوں سے خطاب کرتے ہوئے انہوں نے کہا 3 نومبر کوآزاد کشمیر سمیت پورے ملک میں شٹر ڈاﺅن ہڑتال ہوگی تمام تجارتی مراکز بند رہیں گے،ہر تاجر اپنی دکان بند کر کے اپنے ایمان اور ختم نبوت کی شان پر گواہی دے گا۔ انہوں نے کہاکہ تمام چیمبرز آف کامرس اور ٹریڈ یونین سے اپیل ہے کہ وہ تجارتی مراکز بند کرکے عقیدہ ختم نبوت کے ساتھ اپنی ایمانی وابستگی کا ثبوت دیں۔ انہوں نے حکومت اور اپوزیشن پر تنقید کرتے ہوئے کہا کہ عمران خان اور زرداری کی عقیدہ ختم نبوت کے ایشوپر خاموشی کئی سوالات جنم دے رہی ہے ۔انہوں نے کہا میرے پرسنل سیکرٹری مولانا ذوالفقار علی جلالی کو ختم نبوت دھرنا کے قریب سے صبح 10 بجے اغواکر لیاگیا اگر انہیں کچھ ہوا تو حکومت ذمہ دار ہو گی ۔دریں اثنا تحریک لبیک کےرہنما مولانا عبد الرشید اویسی نے تمام شرکا دھرنا سے قائد تحریک ڈاکٹر محمد اشرف آصف جلالی کے لئے بیعت وفا لی ۔ دوسری طرف لاہور، قصور، فیصل آباد، گجرات، سیالکوٹ میں بھی مظاہرے کیے گئے۔ انہوں نے کہا کہ 3نومبر بروز جمعتہ المبارک آزاد کشمیر سمیت پورے ملک میں شٹرڈاﺅن ہڑتال ہوگی، تمام تجارتی مراکز بند رہیں گے، ہر تاجر اپنی دوکان بند کرکے اپنے ایمان اور ختم نبوت کی شان پر گواہی دے گا اور تمام چیمبرز آف کامرس اور ٹریڈ یونین سے اپیل کی ہے کہ وہ تجارتی مراکز بند کرکے عقیدہ ختم نبوت کے ساتھ اپنی ایمانی وابستگی کا ثبوت دیں۔ اس روز ہزاروں مساجد میں ختم نبوت دھرنا کی حمایت اور مطالبات کی منظوری کیلئے قراردادیں منظور کی جائیں گی اور جمعہ کے بعد احتجاجی ریلیاں نکالی جائیں گی جبکہ مختلف چوکوں اور شاہراہوں پر دھرنے دیئے جائیں گے۔ پرنسپل سیکرٹری مولانا ذوالفقار علی جلالی کو ختم نبوت دھرنا کے قریب سے صبح دس بجے اغوا کرلیا گیا ہے اگر انہیں کچھ ہوا تو حکومت ذمہ دار ہوگی۔ دھرنے میں شہید ناموس رسالت حضرت غازی علم الدین شہیدؒ کے عرس کی خصوصی تقریب منعقد کی گئی۔ ادھر لاہور بابو صابو انٹر چینج پر چوتھے دن بھی دھرنا جاری رہا اس کے علاوہ قصور، مظفر آباد، میرپور، کراچی، سندھ، ڈیرہ اسماعیل خان، ملتان، فیصل آباد، گجرات، نارووال، تلہ گنگ، سیالکوٹ اور دیگر شہروں میں بھی جاری رہا۔ دریں اثنا جمعیت علماءپاکستان (نورانی) و ملی یکجہتی کونسل کے صدر صاحبزادہ ابوالخیر محمد زبیر کی ہدایت پر جمعیت علماءپاکستان (نورانی) کا اعلیٰ اختیاراتی وفد جے یو پی سپریم کونسل کے چیئرمین پیر سید ناصر جمیل ہاشمی کی قیادت میں تحریک لبیک یا رسول اللہ کی طرف سے جاری ڈی چوک کے دھرنے میں پہنچا جن کا پرتپاک خیر مقدم کیا گیا۔

اسلام آباد (آئی این پی) پیپلزپارٹی پارلیمنٹیرینز کے سربراہ اورسابق صدر آصف علی زرداری نے ایک سینئر وزیر کی طرف سے سابق وزیر اعظم نوازشریف سے ملاقات کرنے کی کوششوں کا ایک مرتبہ پھر مثبت جواب دینے سے انکار کر دیا ہے اور (ن) لیگ سے پیپلز پارٹی کے رابطوں کی بحالی کا اختیار سابق وزیر پٹرولیم ڈاکٹر عاصم حسین کو دے دیا ہے ۔ باخبر ذرائع کے مطابق ایک اہم سینئر وفاقی وزیر جن کا ماضی میں سابق صدر آصف علی زرداری سے ہمیشہ قریبی رابطہ رہا ہے نے اب تک 5 مرتبہ پیپلز پارٹی کے متعدد رہنماﺅں کے ذریعے آصف زرداری سے رابطہ کرنے کی کوشش کی اور کہیں مرتبہ اس وفاقی وزیر نے آصف زرداری کے ذاتی موبائل فون پر بھی رابطہ کیا جس کا آصف زرداری نے جواب دینے سے گریز کیا ۔ ذرائع کا کہنا ہے کہ آصف زرداری سابق وزیر اعظم نواز شریف سے دوبارہ ملاقات کرنے پر رضا مند نہیں ہو رہے اور جب پیپلز پارٹی کے دو رہنماﺅں نے اس سینئر وزیر کی طرف سے آصف زرداری کو نواز شریف سے ملاقات کرنے کا پیغام دیا تو انہوں نے سابق وزیر پٹرولیم ڈاکٹر عاصم حسین کو اپنے پاس بلا لیا اور پیغام لانے والے پیپلز پارٹی کے رہنماءسے کہا کہ اگر ڈاکٹر عاصم اجازت دے دیں تو (ن) لیگ سے بات ہو سکتی ہے ۔ ڈاکٹر عاصم کے ساتھ ن لیگ کی حکومت نے بہت زیادتیاں کی ہیں اور میں اس قریبی دوست کی اجازت کے بغیر نواز شریف یا (ن) لیگ سے کسی قسم کا رابطہ نہیں کرنا چاہتا ۔ ذرائع کا کہنا ہے کہ پیپلز پارٹی 2015 میں ڈاکٹر عاصم کی گرفتاری اور پیپلز پارٹی کے ساتھ ہونے والے سلوک کے بعد (ن) لیگ پر دوبارہ اعتماد کرنے کے لئے رضا مند نہیں ہو رہی اسی لئے آصف زرداری سینئر وفاقی وزیر کے رابطوں پر کسی قسم کا جواب دینے کے لئے تیار نہیں ہیں ۔ واضح رہے کہ یہ سینئر وفاقی وزیر ہمیشہ آصف زرداری سے رابطوں میں رہے ہیں اور ان کی پیپلز پارٹی کے ایک اہم رہنما سے قریبی رشتہ داری بھی ہے۔

لاہور (خصوصی رپورٹ) سپریم کورٹ بار کے سالانہ انتخابات میں عاصمہ جہانگیر کے حمایت یافتہ صدارتی امیدوار پیر کلیم احمد خورشید سپریم کورٹ بار کے صدرمنتخب ہو گئے، جیت کی خوشی میں حامیوں کا جشن، نومنتخب صدر پیر کلیم احمد خورشید نے کہا ہے کہ ووٹ کے ذریعے ملک کا تحفط کروں گا۔سپریم کورٹ بار کے سالانہ انتخابات میں صدارتی امیدوار پیر کلیم احمد خورشید واضح برتری سے صدر منتخب ہو گئے۔ پیر کلیم احمد خورشید نے ایک ہزار تین سو پچانوے ووٹ حاصل کئے جبکہ ان کے مد مقابل صدارتی امیدوار حافظ عبدالرحمن انصاری ایک ہزار تین سو آٹھ ووٹ حاصل کر پائے۔سیکرٹری کی نشست پر صفدر تارڑ نے ایک ہزار اٹھانوے ووٹ حاصل کر کے برتری حاصل کی جبکہ ان کے مد مقابل امیدوار میاں اسلم چھ سو اڑتیس ووٹ حاصل کر کے دوسرے نمبر پر رہے۔ قمرالزمان قریشی پنجاب سے نائب صدر کی نشت جیت گئے، انتخابی نتائج کا اعلان ہوتے ہی جیتنے والے عہدیداروں کے حامیوں نے جشن منایا، نو منتخب عہدیداروں کو پھولوں کے ہار پہنائے گئے اور مٹھائیاں تقسیم کی گئیں۔نو منتخب صدر پیر کلیم احمد خورشید کا کہنا ہے کہ وکلاءسے کئے وعدوں کو پورا کروں گا اور ان کے حقوق کا تحفظ کروں گا، آئین اور قانون کی بالا دستی کے لئے ہمیشہ جدوجہد کی اور کرتا رہوں گا۔نومنتخب سیکرٹری سپریم کورٹ بار صفدر حسین تارڑ کا کہنا ہے کہ وہ وکلاءکی توقعات پر پورا اتریں گے۔سپریم کورٹ بار ایسوسی ایشن کے سالانہ انتخابات منگل کے روز پ±رامن طور پر اختتام پذیر ہوئے، سپریم کورٹ لاہور رجسٹری میں کل 958 ووٹرز نے ووٹ کاسٹ کیے، جبکہ لاہور میں کل ووٹرز کی تعداد 1287 تھی۔ پولنگ صبح آٹھ بجے سے شام پانچ بجے تک پ±رامن طور پر جاری رہی، پولنگ کے لیے اضافی وقت نہیں دیا گیا۔سپریم کورٹ لاہور رجسٹری میں پولنگ اسٹیشن پر سابق چیف جسٹس آف پاکستان جسٹس (ر) تصدیق جیلانی، چیئرمین ایگزیکٹو کمیٹی پاکستان بار حفیظ الرحمان چوہدری، سابق چیف جسٹس لاہور ہائی کورٹ جسٹس (ر) خواجہ شریف، پنجاب کے سابق گورنرز خواجہ طارق رحیم، شاہد حامد، سردار لطیف خان کھوسہ، جسٹس (ر) ملک قیوم، اعتزاز احسن، عاصمہ جہانگیر، رمضان چوہدری، حامد خان، احسن بھون، علی احمد کرد، سابق صدور لاہور ہائیکورٹ بار شفقت محمود چوہان، پیر مسعود چشتی، صدر لاہور ہائیکورٹ بار چوہدری ذوالفقار علی کے علاوہ دیگر سئینر وکلاءرہنماو¿ں نے ووٹ کاسٹ کیا۔ سپریم کورٹ بار کی موجودہ باڈی کی جانب سے سپریم کورٹ لاہور رجسٹری میں ایک سے دو بجے دوپہر تک کھانے کا وقفہ کیا گیا۔وکلاءکا کہنا ہے کہ بار ایسوسی ایشن کے ہر سال ہونے والے پ±رامن انتخابات جمہوریت کی بہترین مثال ہیں۔

لاہور (خصوصی رپورٹ) پاکستان سٹاک ایکسچینج کے درجن بڑے سٹاک بروکرز کے خلاف ان سائیڈز ٹریڈنگ اور مصنوعی اتار چڑھاﺅ کی تحقیقات شروع ہوگئی ہیں‘ جس کے باعث بروکرز میں کھلبلی مچ گئی۔ حکومت سے قربت رکھنے والے بروکرز نے دیگر سیاسی جماعتوں سے تعلقات استوار کرنا شروع کردیئے۔ تحقیقات میں سلطانی گواہ بننے اور تعاون کے بدلے رعایت لینے کے بھی ایس ای سی پی ‘ نیب اور دیگر اداروں سے رابطہ کرنے تھے۔ باخبر ذرائع کے مطابق ایس ای سی پی کے پاس گزشتہ تین سال کے دوران مخصوص انداز میں سرمایہ کاری اور سرمائے کے انخلاءمارکیٹ سے باہر ہی معاملات طے کرکے ان سائیڈ ٹریڈنگ کرنے اور گٹھ جوڑ کرکے مصنوعی اتار چڑھاﺅ کے ذریعے اربوں روپے منافع کمانے کی شکایات موجود ہیں۔ اس کے علاوہ ایف آئی اے کے پاس بھی منی لانڈرنگ اور دیگر غیرقانونی سرگرمیوں سے متعلق شکایات ہیں لیکن بااثر افراد کے دباﺅ کی وجہ سے تحقیقات پر پیش رفت نہیں ہورہی تھی اور معاملات سردخانے کی نذر کئے جاتے رہے تاہم اب بدلتی صورتحال میں سٹاک بروکرز کی فائلیں کھل گئی ہیں۔ ذرائع کا کہنا ہے کہ اعلیٰ حکومتی شخصیات کے ہائی پروفائل کیسز کے بعد دوسرے مرحلے میں سٹیٹ بینک‘ نیشنل بینک‘ ایس ای سی پی اور سٹاک ایکسچینج کے بروکرز کے خلاف تحقیقات میں تیزی آئے گی۔ سٹاک ایکسچینج کے بڑے بروکرز کی غیرقانونی سرگرمیوں کے ضمن میں متعدد بینکوں اور مالیاتی داروں کے ذمہ داران بھی قانون کی گرفت یں آئیں گے جن سے گٹھ جوڑ کے مصنوعی اتار چڑھاﺅ کے ذریعے ذاتی کمائی کیلئے اداروں اور عام سرمایہ کاروں کو بھاری نقصان پہنچایا گیا کئی بینکوں اور مالیاتی اداروں کے اعلیٰ افسران کے بروکریج ہاﺅسز سے گٹھ جوڑ کی بھی انکوائری کی جاری ہے جنہوں نے اپنے اداروں کی حصص خریداری کی ٹائمنگ اور جس کمپنی کے شیئرز بیچے یا خریدے ہیں اور دیگر متعلقہ خفیہ معلومات بروکریج ہاﺅسز کو فراہم کیں جس کا باقاعدہ اٹھایا گیا۔ ذرائع کا کہنا ہے کہ بیرونی سرمایہ کاری کی آڑ میں منی لانڈرنگ اور کالادھن سفید کرنے میں بروکر ملوث ہیں۔ تحقیقات شروع ہونے کی اطلاعات کے باعث سٹاک ایکسچینج کے بروکرز میں کھلبلی مچ گئی ہے اور کئی بوکرز نے حکومتی جماعت سے تعلق ترک کرکے دیگر اہم سیاسی جماعتوں سے رابطے قائم کرلئے ہیں اور ان کے فلاحی کاموں میں چندہ بھی دینے لگے ہیں۔ ایس ای سی پی کی جانب سے سٹاک بروکرز کے 20 بڑے کیسز کھلنے ہی اطلاعات گردش کررہی ہے جبکہ ایف آئی اے نے بھی کئی معاملات کی چھان بین تیز کردی ہے۔ تحقیقاتی اداروں کی ان سرگرمیوں کے باعث سٹاک ایکسچینج میں بے چینی بڑھ گئی اور بروکریج ہاﺅسز کی وجہ سے گھبراہٹ میں حصص کی فروخت کے رجحان کے باعث گزشتہ دو روز یعنی پیر اور منگل کو انڈیکس 1400 سے زائد پوائنٹس گرچکا ہے جبکہ حصص کی قیمتیں گرنے سے مارکیٹ کی مالیت میں دو کھرب روپے تک کمی آچکی ہے۔

لاہور (خصوصی رپورٹ) لاہور سمیت پنجاب کے متعدد علاقوں میں سموگ کی شدت میں بتدریج اضافہ ہو رہا ہے جس کے باعث شہریوں کو شدید مشکلات کا سامنا ہے۔ سموگ کے باعث آنکھوں اور سانس کی بیماریوں میں بھی اضافہ ہو گیا ہے۔ لاہور سے پنڈی بھٹیاں
موٹروے پر اکثر مقامات دھند کی لپیٹ میں آ گئے جس سے حد نگاہ پچاس میٹر سے کم رہ گئی۔ موٹروے پولیس نے شہریوں کو غیرضروری سفر اور تیزرفتاری سے گریز کی ہدایت کردی اور گاڑیوں میں فوگ لائٹس لگائیں۔ شہری موٹروے پر کسی بھی ایمرجنسی کی صورت میں ایک تین صفر پر کال کر سکتے ہیں۔ محکمہ ماحولیات کو محکمہ موسمیات کے تعاون سے بروقت آگہی مہم شروع کرنی چاہئے تھی۔ شہروں اور دیہات میں بھرپور مہم نہیں چلائی جا سکی۔ محکمہ موسمیات کے مطابق اگلے آٹھ دس دنوں میں بارش کا کوئی امکان نہیں‘ جب تک بارش نہیں ہو گی سموگ کا خاتمہ نہیں ہو گا۔ سموگ کی وجہ سے شہریوں کو مختلف بیماریوں کا سامنا ہے‘ خاص طور پر آنکھوں‘ سینے اور پھیپھڑوں کے امراض بڑھ رہے ہیں۔ دمے کے مریضوں کی تکلیف میں اضافہ ہو گیا ہے۔ جلدی امراض کی شکایات بھی بڑھ گئی ہیں۔ شہریوں کو ماسک پہننے کی تاکید کی گئی ہے۔ مسئلہ یہ ہے کہ دھواں دینے والی گاڑیوں اور فیکٹریوں کے خلاف بھرپور مہم نہیں چلائی جا رہی ہے۔ اسی طرح دیہات میں کھیتوں کی صفائی کے مڈھوں اور دیگر اشیاءکو آگ لگانے سے روکنے کیلئے بھی کوئی اقدامات نہیں کئے جا رہے ہیں۔ ہسپتالوں اور دفاتر کے علاوہ گلی محلوں میں پڑے ہوئے کوڑاکرکٹ کو تلف کرنے کی بجائے آگ لگانے کا سلسلہ کسی روک ٹوک کے بغیر جاری ہے۔ آلودگی اور خشک سالی کی وجہ سے سموگ کا سلسلہ موثر اقدامات ہی سے ختم ہو گا‘ اس پر خصوصی توجہ دینے کی ضرورت ہے۔