لاہور (خصوصی رپورٹ)سابق وزیراعظم نوازشریف کی لاہور آمد پر والہانہ استقبال کرنے کا فیصلہ کرلیاگیا۔ وہ عبوری وزیراعظم شاہدخاقان عباسی کی ممکنہ تقریب حلف برداری میں شرکت کرنے کے بعد جمعرات کو لاہور آئیں گے۔ نوازشریف کے بھرپور استقبال کیلئے تیاریاں بھی شروع کردی گئی ہیں۔ مسلم لیگ ن کے ذرائع نے بتایا کہ سابق وزیراعظم نوازشریف نے جمعرات کو اپنے آبائی شہر لاہور پہنچنے کا فیصلہ کرلیا ہے اور لاہور آمد کے موقع پر ان کا بھرپور استقبال کیا جائیگا اور اس سلسلے میں دو پلان مرتب کئے گئے ہیں۔ بائی ائیر واپسی پر نوازشریف لاہور ائیرپورٹ سے براستہ مال روڈ ، کینال روڈ سے ہوتے ہوئے رائے ونڈ جائیں گے اور دوسری صورت میں موٹروے ٹھوکر نیاز بیگ سے ریلی کی شکل میں رائے ونڈ جاتی امرا جائیں گے۔ ذرائع کا کہنا ہے کہ نوازشریف کے اہل خانہ بھی ان کے ہمراہ ہوںگے۔ جبکہ رائے ونڈ ان کی رہائش گاہ کی جانب جانے والے راستوں پر ان کے خیر مقدمی بینرز اور پوسٹرز بھی آویزاں کئے جائیںگے۔
