رسالپور: (ویب ڈیسک) جنرل زبیر محمود نے کہا ہے کہ کشمیریوں سے محبت ہمارے خون میں شامل ہے، کشمیر تقسیم ہند کا نامکمل ایجنڈا ہے، مسئلہ کشمیر سے متعلق اقوام متحدہ کی قراردادوں پر عملدرآمد ہونا چاہیے۔چیئرمین جوائنٹ چیفس آف سٹاف جنرل زبیر محمود نے تقریب سے خطاب کرتے ہوئے کہا پاکستان امن کا خواہاں ہے، ہماری خواہش کو کمزوری نہ سمجھا جائے، خون کے آخری قطرے تک ملک کا دفاع یقینی بنائیں گے، بھارت میں نسلی اور مذہبی امتیاز کو فروغ دیا جا رہا ہے، پاکستان ایک ذمہ دار جوہری طاقت ہے، پاکستان تخفیف اسلحہ کی عالمی پالیسی پر عمل پیرا ہے، پاکستان نے دہشتگردی کیخلاف جنگ میں اہم کردار ادا کیا، دہشتگردی کیخلاف جنگ میں کامیابی سے امن حاصل ہوا۔

راولپنڈی: (ویب ڈیسک) بھارتی فوج کی ایل او سی پر بلا اشتعال فائرنگ سے پاک فوج کا سپاہی نعمت ولی شہید جبکہ 2 خواتین زخمی ہوگئیں۔آئی ایس پی آر کے مطابق بھارت نے ایل او سی کے بروہ اور چری کوٹ سیکٹر پربلااشتعال فائرنگ کی، زخمی ہونے والی 2 خواتین کا تعلق سریاں گاﺅں سے ہے۔پاک فوج نے بھرپور جوابی کارروائی کرتے ہوئے بھارتی چیک پوسٹوں کو نشانہ بنایا، موثر جوابی کارروائی میں متعدد بھارتی فوجیوں کے ہلاک ہونے کی اطلاع ہے جبکہ بھارتی چوکیوں کو بھی کافی نقصان پہنچنا ہے۔

لاہور: (ویب ڈیسک)مسلم لیگ ن کے صدر شہباز شریف نے مولانا فضل الرحمان کے دھرنے میں شرکت کی مخالفت کر دی۔مسلم لیگ ن پاکستان کے صدر شہبازشریف کی زیر صدارت ہونے والے اجلاس کی اندرونی کہانی سامنے آگئی۔ذرائع کے مطابق شہباز شریف نے پارٹی اجلاس میں مولانا فضل الرحمان کے دھرنے میں بھرپور شرکت کی مخالفت کر دی۔ شہباز شریف نے کہا کہ مولانا فضل الرحمان کے دھرنے میں شرکت کرنے کے بجائے ہمیں اپنے احتجاج کا پروگرام بنانا چاہئے۔انہوں نے کہا کہ مولانا فضل الرحمان نہایت قابل احترام ہیں تاہم موجودہ دھرنے اور احتجاج کا کریڈٹ مولانا فضل الرحمان کو جائے گا لہٰذا ہمیں اس میں شرکت نہیں کرنی چاہیے۔

کراچی: (ویب ڈیسک)سندھ حکومت نے 14 اکتوبر کو شاہ عبدالطیف بھٹائی کے عرس پر عام تعطیل کا اعلان کردیا۔سندھ حکومت کی جانب سے جاری کردہ اعلامیے کے مطابق 14 اکتوبر کو شاہ لطیف بھٹائی کے عرس کے موقع پرعام تعطیل ہوگی جس کا باقاعدہ نوٹی فکیشن جاری کردیا گیا ہے۔ نوٹی فکیشن کے مطابق سندھ حکومت اور اس کے ذیلی ادارے، ضلعی انتظامیہ کے ماتحت ادارے اور سرکاری و غیر سرکاری درس گاہیں 14 اکتوبر کو بند رہیں گی۔

کراچی: (ویب ڈیسک)پاکستان پیپلز پارٹی نے جے یو آئی کے آزادی مارچ کی حمایت کا اعلان کردیا اور کہا ہے کہ جس شہر سے بھی آزادی مارچ گزرے گا پیپلز پارٹی وہاں بھرپور سپورٹ کرے گی۔اس بات کا اعلان چیئرمین پیپلز پارٹی بلاول بھٹو زرداری نے پیپلز پارٹی کی کور کمیٹی کے اجلاس کے بعد پی پی پی میڈیا سیل میں پریس کانفرنس سے خطاب کرتے ہوئے کیا۔ اس موقع پر پارٹی کی مرکزی قیادت بھی ان کے ہمراہ موجو تھی۔ بلاول بھٹو زرداری کا کہنا تھا کہ پاکستان پیپلز پارٹی مولانا فضل الرحمن کے آزادی مارچ کی حمایت کا اعلان کرتی ہے جس جگہ جس شہر جس وقت آزادی مارچ ہوگا پیپلز پارٹی وہاں استقبال اور مکمل سپورٹ کرے گی۔