لاہور: (ویب ڈیسک) مسلم لیگ (ق) کے سربراہ چودھری شجاعت حسین کی زیر صدارت پارٹی کا اہم اجلاس ہوا جس میں ملک میں جاری سیاسی بحران پر مشاورت کی گئی۔
اجلاس میں پارٹی کے چیف آرگنائزر چودھری محمد سرور، جنرل سیکرٹری طارق بشیر چیمہ، نائب صدر چودھری سالک حسین اور جنرل سیکرٹری پنجاب چودھری شافع حسین نے شرکت کی، اس موقع پر موجودہ سیاسی صورتحال، پنجاب میں انتخابات کیلئے پارٹی ٹکٹوں کی تقسیم پر بھی تبادلہ خیال کیا گیا۔
اجلاس میں پارٹی رہنماؤں نے پنجاب میں انتخابات کیلئے اچھے امیدواروں کو ٹکٹس دینے کا فیصلہ کیا، اس کے علاوہ ملک بھر میں ایک ہی دن انتخابات کے حوالے سے مفاہمتی عمل کیلئے پارٹی کی 4 رکنی مذاکراتی کمیٹی بنانے پر بھی اتفاق ہوا، کمیٹی کے ممبران میں چودھری سرور، طارق بشیر چیمہ، چودھری سالک حسین اور چودھری شافع حسین شامل ہوں گے۔
اس موقع پر گفتگو کرتے ہوئے چودھری شجاعت حسین نے کہا کہ ملک کسی صورت بھی اداروں میں تقسیم در تقسیم کا متحمل نہیں ہو سکتا ہے، سیاسی اختلافات کو پس پشت ڈال کر ملک کے وسیع تر مفاد کیلئے تمام سیاسی قوتوں کو ایک ساتھ اکٹھے بیٹھنا چاہیے، ناممکنات میں سے ممکنات کے امکانات پیدا کرنا ہی سنجیدہ اور زیرک سیاسی قائدین کا خاصہ ہے۔
چودھری سرور نے اپنی گفتگو میں کہا کہ مسلم لیگ پورے ملک میں ایک ہی روز انتخابات چاہتی ہے، ایک روز انتخابات نہ ہونے کی صورت میں سیاسی بحران میں مزید اضافہ ہو گا، پنجاب میں الیکشن کے حوالے سے پارٹی ٹکٹس جلد الیکشن کمیشن میں جمع کروا دیں گے، پارٹی کو منظم کرنے کا سلسلہ جاری ہے، معروف سیاسی شخصیات پارٹی میں شامل ہو رہی ہیں۔

اسلام آباد: (ویب ڈیسک) ممتاز سیاسی شخصیت اور سینیٹ کے سابق رکن انور بیگ انتقال کر گئے۔
انوربیگ کی نمازجنازہ کل عید کے روز نماز ظہر کے بعد ایچ 8 قبرستان میں ادا کی جائے گی، سابق سینیٹر کے انتقال کی خبر پر مختلف سیاسی و سماجی شخصیات نے افسوس کا اظہار کیا ہے۔
انور بیگ پاکستان پیپلز پارٹی اور مسلم لیگ (ن) کا بھی حصہ رہے، پیپلز پارٹی کے سابق دور حکومت میں وہ بینظیر انکم سپورٹ پروگرام کے چیئرمین کے عہدے پر بھی فائز رہے۔

لاہور: (ویب ڈیسک) امیر جماعت اسلامی سراج الحق نے کہا ہے کہ مولانا فضل الرحمان صاحب سے بھی رابطہ ہوا ہے، وہ بھی ملک کی بہتری چاہتے ہیں، الیکشن کی متفقہ تاریخ تک پہنچنے میں وقت لگے گا، ہم نے اسٹیبلشمنٹ کو تکلیف نہیں دی، وہ اپنا کام کریں جس کا حلف انہوں نے اٹھایا ہے۔
میڈیا سے گفتگو کرتے ہوئے امیر جماعت اسلامی نے کہا ہے کہ جلسہ، جلوس، احتجاج ہر شہری کا آئینی حق ہے، گوادر شہر سمندر کے کنارے تو آباد ہے لیکن پانی سے محروم ہے، گوادر میں شدید بد امنی ہے، وہاں منشیات فروشی کا دھندہ عام ہے، وعدوں کے باوجود باہر کا ٹرالر مافیا سمندر پر قابض ہے، صوبائی حکومت نے لوگوں سے کیے گئے معاہدے پر عمل نہیں کیا، مولانا ہدایت الرحمان صاحب 100دن سے جیل میں ہیں۔
سراج الحق نے کہا کہ گوادر کو ساری دنیا کیلئے تماشہ بنایا گیا، سی پیک کے حوالے سے گوادر ایک حساس شہر ہے، ہماری خواہش ہے اس علاقے میں مکمل امن ہو، صوبائی حکومت شاید یہی چاہتی ہے کہ لوگ مشتعل ہوں، بلوچستان آتش فشاں بن جائے گا، صوبائی حکومت، اسٹیبلشمنٹ سے پوچھتا ہوں آپ چاہتے کیا ہیں؟ لوگوں کی 100 فیصد پرامن تحریک ہے، ایک پرامن احتجاج کرنے والے اپنا حق مانگ رہے ہیں۔
امیر جماعت اسلامی نے کہا کہ بہانوں کے ذریعے یہ چاہتے ہیں مولانا ہدایت الرحمان جیل میں ہی رہیں، جماعت اسلامی گوادر کے ماہی گیروں کے ساتھ اظہار یکجہتی کیلئے یکم مئی کو پورے پاکستان میں احتجاج کر رہی ہے، ہم پورے ملک کے بڑے بڑے شہروں میں احتجاج کریں گے، ایک بار پھر حکومت کو خبردار کرتا ہوں کہ مولانا ہدایت الرحمان کو فوراً رہا کیا جائے، جماعت اسلامی اس ظلم کی مذمت کرتی ہے۔
سراج الحق نے مزید کہا ہے کہ اس وقت ملک میں سیاسی بحران ہے، سیاسی بحران کے ساتھ معاشی اور آئینی بحران بھی ہے، قومی اسمبلی، سینیٹ اور سپریم کورٹ میں عام لوگوں کے حوالے سے کوئی کیس نہیں، الیکشن ایک یا دو پارٹیوں کا مسئلہ نہیں یہ 23 کروڑ عوام کا مسئلہ ہے، جماعت اسلامی پورے ملک کا الیکشن چاہتی ہے، صرف پنجاب میں الیکشن ہونے سے احتجاج اور خانہ جنگی ہو گی۔
انہوں نے کہا کہ ہم نہیں چاہتے ہمارا ملک لیبیا بنے، غریب عوام کیلئے سانس لینا مشکل ہو گیا ہے، عدالت کے جج ایک پیج پر نہیں ہیں، وہ بھی آپس میں لڑ رہے ہیں، ہم چاہتے ہیں ماضی کی طرح جھرلو الیکشن نہ ہوں، ہم یہ بھی چاہتے ہیں الیکشن اغوا نہ ہوں، ہم مسلسل سیاسی جماعتوں کے ساتھ رابطے میں ہیں، دلیل کی جگہ گالی نے لے لی ہے، بے انتہا فاصلے بڑھ گئے ہیں، لوگوں کو ایک جگہ متفق کرنا مشکل کام ہے۔
امیر جماعت اسلامی نے کہا کہ امید ہے ہم کامیاب ہو جائیں گے، پیپلز پارٹی، اے این پی نے مذاکرات کی بات کی ہے، وزیر اعظم چاہتے تھے ہم اس بند گلی سے نکلیں، عمران خان نے بھی مثبت جواب دیا، سپریم کورٹ کا رویہ بھی یہی ہے کہ آپس میں بیٹھ کر کوئی راستہ نکالیں، سپریم کورٹ نے کل خود ہی کہا آپ 27 تاریخ تک خود ہی راستہ نکال لیں، عید کے بعد ہم اس عمل میں تیزی لائیں گے۔

رحیم یار خان: (ویب ڈیسک) نگران وزیراعلیٰ پنجاب پولیس کے جوانوں کا حوصلہ بڑھانے کچے کے علاقے پہنچ گئے، محسن نقوی نے کچے کے علاقے میں اگلے مورچوں کا دورہ بھی کیا۔
نگران وزیراعلیٰ پنجاب محسن نقوی نے کچے کے علاقے میں دہشت گردوں کے خلاف جاری آپریشن کا جائزہ لیا اور آپریشن میں حصہ لینے والے پولیس افسروں اور جوانوں سے ملاقات کی۔
اس موقع پر نگران وزیر اطلاعات عامر میر، چیف سیکرٹری زاہد اختر زمان، آئی جی پنجاب اور ایڈیشنل چیف سیکرٹری داخلہ نگران وزیراعلیٰ کے ہمراہ تھے، ایڈیشنل آئی جی سی ٹی ڈی، ایڈیشنل آئی جی سپیشل برانچ، سیکرٹری تعمیرات ومواصلات، قانون نافذ کرنے والے اداروں کے اعلیٰ حکام اور متعلقہ افسران بھی دورے پر محسن نقوی کے ہمراہ موجود تھے۔
نگران وزیراعلیٰ پنجاب نے پولیس جوانوں کے حوصلے اور جذبے کو بھی سراہا اور پولیس کے جوانوں کو عید کی مبارکباد اور عیدی دی، محسن نقوی اور انسپکٹر جنرل پولیس ڈاکٹر عثمان انور نے پولیس جوانوں کے ساتھ مل کر پاکستان زندہ باد، پنجاب پولیس زندہ باد کے نعرے بھی لگائے۔
نگران وزیراعلیٰ محسن نقوی کا کہنا تھا کہ کچے کے علاقے میں پولیس کو ڈاکوؤں کے خلاف آپریشن کے دوران نمایاں کامیابیاں حاصل ہوئی ہیں، پنجاب پولیس کے بہادر افسروں اور جوانوں پر فخر ہے، کچے کے علاقے میں امن بحال کرنے کیلئے آخری حد تک جائیں گے۔
نگران وزیراعلیٰ پنجاب کا مزید کہنا تھا کہ دہشت گردوں کے ٹھکانے ختم کر کے مستقل انفراسٹرکچر قائم کیا جائے گا، ان عناصر کو کچے کے علاقے میں دوبارہ پنپنے نہیں دیں گے۔

اسلام آباد: (ویب ڈیسک) پاکستان تحریک انصاف کے مرکزی رہنما فواد چودھری نے کہا ہے کہ بلاول بھٹو کا بھارت کا دورہ کشمیریوں کی جدوجہد کی پیٹھ میں خنجر گھونپنے کے مترادف ہے۔
سماجی رابطے کی ویب سائٹ ٹوئٹر پر اپنے بیان میں سابق وفاقی وزیر اطلاعات فواد چودھری نے کہا کہ کشمیر کے معاملے کو دفن کرکے بھارت سے تعلقات بنانا عالمی ایجنڈے کا حصہ ہے، عالمی ایجنڈے کے تحت اس حکومت کو پاکستان پر مسلط کیا گیا۔
انہوں نے کہا کہ بھارت سمیت دیگر ممالک سے تعلقات کے حامی ہیں لیکن کسی طور بھی ذیلی ملک نہیں بن سکتے، تعلقات برابری کی سطح اور بنیادی معاملات پر تصفیہ کیلئے ہونے چاہئیں، پاکستان اپنے قریبی دوست ممالک کیلئے اہمیت کھورہا ہے، یہ بات انتہائی تشویشناک ہے۔

اسلام آباد: (ویب ڈیسک) سرکاری چھٹی کے روز بھی وزیراعظم شہبازشریف کی لاہور میں بھرپور سیاسی مصروفیات جاری ہیں۔
شہباز شریف سے ماڈل ٹاؤن میں مسلم لیگ ن کی اعلیٰ قیادت اور قانونی ماہرین نے اہم ملاقاتیں کی ہیں۔
دوران ملاقات وزیراعظم نے لیگی رہنماؤں قانونی ماہرین سے ملکی سیاسی و آئینی صورتحال اور ملک میں ایک ہی دن انتخابات کرانے کے کیس سےمتعلق تفصیلی مشاورت کی۔
وزیر اعظم سے ملاقات کرنے والوں میں خواجہ سعد رفیق، ایاز صادق، اعظم نذیر تارڑ، ملک احمد خان اور لیگی رہنما شزا فاطمہ، سابق وفاقی وزیر قانون زاہد حامد اور اٹارنی جنرل منصورعثمان اعوان شامل تھے۔
یاد رہے کہ گزشتہ روز سپریم کورٹ نے ملک بھر میں ایک ہی روز انتخابات کرانے کے حوالے سے کیس کی سماعت 27 اپریل تک ملتوی کر دی ہے، سماعت کے دوران چیف جسٹس آف پاکستان جسٹس عمرعطاء بندیال نے کہا کہ اپنا 14 مئی کا فیصلہ واپس نہیں لیں گے، عدالتی فیصلہ واپس لینا مذاق نہیں ہے۔

لاہور: (ویب ڈیسک) عوامی مسلم لیگ کے سربراہ شیخ رشید نے نگران پنجاب حکومت کو کام سے روکنے کے لئے الیکشن کمیشن کو مراسلہ لکھ دیا۔
شیخ رشید نے اظہرصدیق کے ذریعے مراسلہ الیکشن کمیشن کا ارسال کیا،‏ سربراہ عوامی مسلم لیگ نے اپنے مراسلے میں مؤقف پیش کیا ہے کہ ‏نگران پنجاب حکومت 90 دن کی مدت مکمل ہوچکی ہے، آئینی طور پر نگران حکومت کام کرنے کا اختیار نہیں رکھتی۔
مراسلے میں تنبہہ کرتے ہوئے کہا گیا ہے کہ آرٹیکل 218،220 کے تحت نگران حکومت کو کام سے روکا جائے اور اگر نگران حکومت کو کام سے نہ روکا گیا تو اعلیٰ عدالتوں سے رجوع کیا جائے گا۔