لاہور(ویب ڈیسک) وفاقی وزیر ریلوے شیخ رشید کا کہنا ہے کہ بلاول کو پیغام دیا ہے کہ بھٹو بنیں زرداری نہ بنیں جبکہ شہباز شریف کو این آر او مانگتے ہوئے دیکھا ہے۔لاہور میں ریلوے ہیڈ کوارٹرمیں ہفتہ وار اجلاس کے دوران وزیر ریلوے شیخ رشید نے کہا کہ رواں سال ملک میں 20ٹرینوں کا اضافہ کریں گے، نجی شعبے کے تعاون سے مزید 2 فریٹ ٹرینیں تیار کررہے ہیں، فریٹ ٹرینیں آگئیں توریلوے ترقی کرے گا، اس کے علاوہ 7 بڑے ریلوے اسٹیشنز کی تعمیرنو بھی کرنے جارہے ہیں۔وفاقی وزیر نے کہا میں امریکی صدرڈونلڈٹرمپ کو مستقبل میں پاکستان کا دورہ کرتےدیکھ رہاہوں، امریکا کوافغان مسئلے پر عمران خان کا سیاسی تجزیہ سمجھ آگیا ہے، ہم آئی ایم ایف کی شرائط نہیں مان رہے بلکہ وہ شرائط مان رہے ہیں جوملکی مفاد میں ہوں۔شیخ رشید نے کہا مجھے بلاول کی فکر ہے کہ اس کے ساتھ کیا ہوگا، بلاول کوسیاست کرنی ہے تو وہ بھٹوبنیں، زرداری نہ بنیں، آصف زرداری نے بےنظیرکی موت کاسیاسی فائدہ اٹھایا، زرداری نے بے نظیرکی وصیت کواپنےمقصد کے لیےاستعمال کیا، اس وقت ملک میں جو صورتحال ہے اس کے ذمے دارنوازشریف اور زرداری ہیں۔وزیر ریلوے نے کہا شہباز شریف کو این آر او مانگتے دیکھا اور سنا ہے لیکن وہ جتنا مرضی کوشش کرلیں انہیں این آر او نہیں ملے گا، حلف اٹھاتا ہوں کہ میں جھوٹ نہیں بولتا چاہے وزیر رہوں یا نہ رہوں، میرا پبلک اکاﺅنٹس کمیٹی میں جانا لازمی ہے۔ میں نے پی اے سی کی رکنیت کے لیے باقاعدہ درخواست دی ہے، آئین اورقانون کے تحت کوئی پبلک اکاﺅنٹس کمیٹی کارکن بننے سے نہیں روک سکتا، یہ کہتے تھے اگلی اسمبلی میں شیخ رشید نہیں ہوگا میں ہوں اور پی اے سی میں آرہا ہوں۔شیخ رشید نے مزید کہا کہ شہباز شریف باقی معاملات کا آڈٹ کریں، میں ان کے معاملات کا آڈٹ کروں گا، تحریک انصاف اپنے کس رکن کا نام واپس لیتی ہے یہ ان کا مسئلہ ہے میں اس وقت پارلیمنٹ میں سب سے زیادہ سینئر اور تجربہ کار ہوں۔
