اسلام آباد (وقائع نگار خصوصی، خبر نگار خصوصی) کونسل آف نیوز پیپر ایڈیٹر ز (سی پی این ای) کے زیراہتمام ”میڈیا اور جمہوریت “ کے عنوان سے ملک گیر پاکستان میڈیا کنونشن 2019ملکی تاریخ کا طویل ترین میڈیا کنونشن رہا جو نو گھنٹے تک جاری رہا اس کنونشن میں چار سیشن منعقد ہوئے اس ملک گیر کنونشن میں ملک بھر سے مدیران اخبارات، ٹی وی اینکرز ، تجزیہ نگار، پریس کلب کے صدور، صحافتی تنظیموں کے مرکزی عہد ید اران، سنیئر صحافیوں ، سیاست دانوں، وفاقی و صوبائی وزراءاطلاعات سمیت اعلی حکام نے شرکت کی۔ سی پی این ای کے صدر عارف نظامی نے کہا کہ میں نے طویل صحافتی کیرئر کے دوران پہلی مرتبہ نو گھنٹے تک جاری رہنے والے میڈیا کنونشن دیکھا اور یہ ہر لحاظ سے ایک کامیاب ترین کنونشن تھا۔ سی پی این ای کے سینئر نائب صدر امتنان شاہد نے ”میڈیا اکانومی اینڈ ماڈرن میڈیا“ سیشن کی صدارت کرتے ہوئے ماڈریٹر کے فرائض سر انجام دئیے اس سیشن میں سابق سیکرٹری جنرل سی پی این ای اعجاز الحق، ایڈیٹر پاکستان ٹو ڈے یوسف نظامی، ڈائریکٹر این آئی سی، لمزفیصل شیر جان، سی ای او، اورینٹ میکن مسعود ہاشمی اور چیئرمین برین چائلڈ کام ریحان مرچنٹ شریک تھے۔
